ମୁମ୍ବଇ: ବଲିଉଡ଼ ଅଭିନେତା ସ୍ୱର୍ଗତଃ ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ପରେ ଏବେ ତାଙ୍କ ଉପରେ ଚଳଚ୍ଚିତ୍ର ନିର୍ମାଣ କରିବାକୁ ଯାଉଛନ୍ତି ନିର୍ମାତା ବିଜୟ ଶେଖର ଗୁପ୍ତା। ଫିଲ୍ମର ନାଁ ରହିଛି ‘ସୁଇସାଇଡ଼ ଅର୍ ମର୍ଡର: ଏ ଷ୍ଟାର ୱାଜ୍ ଲଷ୍ଟ’। ତେବେ ଏହାର ମୁଖ୍ୟ ଅଭିନେତାଙ୍କୁ ନେଇ ସୋମବାର ଏକ ବଡ଼ ଖବର ସାମ୍ନାକୁ ଆସିଛି। ଏହି ଫିଲ୍ମରେ ସୁଶାନ୍ତଙ୍କ ଚରିତ୍ରରେ ଅଭିନୟ କରିବେ ଅବିକଳ ତାଙ୍କ ପରି ଦେଖାଯାଉଥିବା ଜଣେ ଯୁବକ। ସେ ହେଉଛନ୍ତି ସଚିନ ତିଓ୍ୱାରୀ।
ସଚିନ ହେଉଛନ୍ତି ଜଣେ ଟିକଟକ୍ ଷ୍ଟାର। ସେ ଅବିକଳ ସୁଶାନ୍ତଙ୍କ ଭଳି ଦେଖାଯାଉଥିବାରୁ ସୁଶାନ୍ତଙ୍କ ମୃତ୍ୟୁ ପରେ ତାଙ୍କୁ ନେଇ ଖୁବ୍ ଚର୍ଚ୍ଚା ହୋଇଥିଲା। ତାଙ୍କ ଟିକଟକ ଭିଡିଓ ଭାଇରାଲ ହୋଇଥିଲା। ଏବେ ଏହି ସଚିନ ସୁଶାନ୍ତଙ୍କ ଫିଲ୍ମରେ ଅଭିନୟ କରିବାର ସୁଯୋଗ ପାଇଛନ୍ତି।
ବିଜୟ ଶେଖର ଗୁପ୍ତାଙ୍କ ପ୍ରଡକ୍ସନ ହାଉସ ଦ୍ୱାରା ନିର୍ମିତ ଏହି ଚଳଚ୍ଚିତ୍ରର ପ୍ରଥମ ପୋଷ୍ଟର ମଧ୍ୟ ରିଲିଜ ହୋଇସାରିଛି। ସେପ୍ଟେମ୍ବର ଅଧା ବେଳକୁ ଏହାର ଶୁଟିଂ କାର୍ଯ୍ୟ ଆରମ୍ଭ ହେବ ବୋଲି ନିର୍ମାତା ସୂଚନା ଦେଇଛନ୍ତି। ‘ସୁଇସାଇଡ଼ ଅର୍ ମର୍ଡର: ଏ ଷ୍ଟାର ୱାଜ୍ ଲଷ୍ଟ’କୁ ଖ୍ରୀଷ୍ଟମାସ ଅବସରରେ ରିଲିଜ୍ କରାଯିବାକୁ ଧାର୍ଯ୍ୟ କରାଯାଇଛି।
