କୁମ୍ଭୀର ପାଳିଥିଲେ ବିଜେପି ନେତା: ଆୟକର ଚଢ଼ାଉ ବେଳେ ଉଦ୍ଧାର ହେଲେ ୩ କୁମ୍ଭୀର, ବିପୁଳ ଟଙ୍କା ଓ ସୁନା ଜବତ

ସମାଜ ଡିଜିଟାଲ ଡେସ୍କ: କୁମ୍ଭୀର ପାଳିଥିଲେ ବିଜେପି ନେତା। କଥାଟା ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ। ଆୟକର ଚଢ଼ାଉ ବେଳେ ମଧ୍ୟପ୍ରଦେଶର ସାଗର ଅଞ୍ଚଳରେ ରହୁଥିବା ଜଣେ ବିଜେପି ନେତା ତଥା ପୂର୍ବତନ ବିଧାୟକଙ୍କ ଘରୁ ୩ଟି କୁମ୍ଭୀର ଉଦ୍ଧାର ହୋଇଛନ୍ତି। ଏହା ସହିତ ତାଙ୍କ ଘରୁ କୋଟି କୋଟି ଟଙ୍କା ଏବଂ ବିପୁଳ ପରିମାଣର ସୁନା, ବେନାମୀ ଇମ୍ପୋର୍ଟେଡ କାର ଜବତ ହୋଇଛି।

ବିଜେପି ନେତା ଜଣକ ହେଉଛନ୍ତି ପୂର୍ବତନ ବିଧାୟକ ହରବଂଶ ସିଂହ ରାଠୋର। ସେ ଜଣେ ବିଡ଼ି ବ୍ୟବସାୟୀ ଏବଂ ପୂର୍ବତନ ମନ୍ତ୍ରୀ ହରନାମ ସିଂହ ରାଠୋରଙ୍କ ପୁଅ। ତାଙ୍କ ଆକାଉଣ୍ଟରେ କୋଟି କୋଟି ଟଙ୍କା ନେଣଦେଣ ହେଉଥିବାବେଳେ ସେ ଟିକସ ଠକେଇ କରୁଥିବା ଅଭିଯୋଗ ହୋଇଥିଲା। ଏ ନେଇ ଆୟକର ବିଭାଗ ପକ୍ଷରୁ ରାଠୋରଙ୍କ ସମେତ ପୂର୍ବତନ କାଉନସିଲର ରାଜେଶ କେଶରୱାନୀଙ୍କ ଘରେ ଚଢ଼ାଉ କରାଯାଇଥିଲା। ଉଭୟେ ସହଭାଗିତାରେ ବିଡି ବ୍ୟବସାୟ କରୁଥିଲେ। କେଶରୱାନି କେବଳ ୧୪୦ କୋଟି ଟଙ୍କାର ଟିକସ ଫାଙ୍କିଥିବା ଆୟକର ଅଧିକାରୀମାନେ କହିଛନ୍ତି।

ତେବେ ରାଠୋରଙ୍କ ଘରେ ଚଢ଼ାଉ ବେଳେ ଅଧିକାରୀମାନେ ଯେଉଁ ଦୃଶ୍ୟ ଦେଖିଥିଲେ ତାହା ସେମାନଙ୍କୁ ବେଶ୍‌ ଆଶ୍ଚର୍ଯ୍ୟ କରିଥିଲା। କାରଣ ରାଠୋରଙ୍କ ଘର ପରିସରରେ ଏକ ଛୋଟିଆ ଜଳାଶୟ ଥିବାବେଳେ ସେଥିରେ ୩ଟି କୁମ୍ଭୀର ରହିଥିଲେ। ଏହା ଦେଖିବା ପରେ ବନ ବିଭାଗକୁ ଖବର ଦିଆଯାଇଥିଲା। ଅଧିକାରୀମାନେ ତାଙ୍କ ଘରୁ ୧୪ କିଗ୍ରା ସୁନା ଏବଂ ୪ କୋଟି ଟଙ୍କା ଜବତ କରିଛନ୍ତି।