ଆରଡି: ବାବା ଆଖଣ୍ଡଳମଣିଙ୍କ ରୋଷଶାଳରେ ରୋଷେୟାଙ୍କ ୧୦/୧୨ଜଣ ସେବାକାରୀ ସକାଳ ନୀତିଭୋଗ ଓ ବଡଭୋଗ ପ୍ରସ୍ତୁତ କରୁଥିବା ସମୟରେ ହଠାତ ରୋଷଶାଳ ଛାତରୁ ଏକ ବଡ କଂକ୍ରିଟ ଖଣ୍ଡ ଖସିପଡ଼ିଥିଲା। ଫଳରେ ରୋଷେୟାଙ୍କ ସହ ୧୦ସେବାୟତ ଅଳ୍ପକେ ବର୍ତ୍ତି ଯାଇଥିଲେ। ହେଲେ ଚୁଲାରେ ନୀତିଭୋଗ ହଣ୍ଡା ଉପରେ କଂକ୍ରିଟ ଖଣ୍ଡ ପଡିବାରୁ ମଣିବାବାଙ୍କ ଡାଲି, ତରକାରୀ ଓ ଖିରି ନୀତିଭୋଗ ନଷ୍ଟ ହୋଇଥିଲା। ଯାହାକି ସୋମବାର ସକାଳ ୯ଟାରେ ହେବାକୁ ଥିବା ପହଡଖିଆ ଅନ୍ନ ନୀତିଭୋଗ ୧ଘଣ୍ଟା ବିଳମ୍ବରେ ୧୦ଟା ପରେ ଲାଗି ହୋଇଥିଲା।
ଅନ୍ୟପଟେ ରୋଷଶାଳ ଛାତ ବିପଦପୂର୍ଣ୍ଣ ହୋଇପଡ଼ିଥିବାରୁ ମଧ୍ୟାହ୍ନ ଧୂପ ନୀତିଭୋଗ ପାଇଁ ରୋଷେୟା ଭୟଭୀତ ଅବସ୍ଥାରେ ରୋଷେଇ କରିଥିବା କହିଥିଲେ। ଏପରିକି ମନ୍ଦିର ରୋଷେୟା ଜଳଧର ପାଢୀଙ୍କ ସହ ଅନ୍ୟ ସେବାକାରୀଙ୍କ କହିବା ଅନୁଯାୟୀ, ଆମେ ଚୁଲା ଲଗାଇ ମଣିବାବାଙ୍କ ଅନ୍ନଭୋଗ ରନ୍ଧନ କରୁଥିବା ବେଳେ କିଛି ପ୍ଲାଷ୍ଟର ଗୁଣ୍ଡ ଖସିଲା ଆମେ ତତ୍କ୍ଷଣାତ ପଳାଇ ଆସିଥିଲୁ। ଏହି ସମୟରେ ହଠାତ ଏକ ବଡ କଂକ୍ରିଟଖଣ୍ଡ ଖସିଥିଲା। ଫଳରେ ପିତଳହଣ୍ଡାରେ ରୋଷେଇ ପାଇଁ ବସିଥିବା ଭୋଗ ସବୁ ନଷ୍ଟ ହୋଇଯାଇଥିଲା। ଏବେବି ରୋଷଶାଳ ଛାତର ଅନେକ ସ୍ଥାନରେ ବଡବଡ ଫାଟ ଦେଖାଦେଇଛି। ଖୁବଶୀଘ୍ର ପ୍ରଶାସନ ପକ୍ଷରୁ ଅନୁଧ୍ୟାନ କରାଯାଇ ମରାମତି କରାଯିବାର ଆବଶ୍ୟକତା ରହିଛି ବୋଲି ମନ୍ଦିରର ବରିଷ୍ଠ ସେବାୟତମାନେ ପ୍ରକାଶ କରିଛନ୍ତି।
