୯୦ ବର୍ଷରେ ପାଦ ଥାପିଲା ଓଡ଼ିଆ ସିନେମା, ଏପ୍ରିଲ ୨୮ କୁ ‘ଓଡ଼ିଆ ସିନେମା ଦିବସ’ ଘୋଷଣା ଦାବି

ଭୁବନେଶ୍ବର : ଏପ୍ରିଲ ୨୮କୁ ଓଡ଼ିଆ ସିନେମା ଦିବସ ଭାବେ ଘୋଷଣା କରିବା ପାଇଁ ଦାବି କଲେ କଳାକାର । ଆଜି ୯୦ ତମ  ଓଡ଼ିଆ ସିନେମା ଦିବସ ପାଳନ ଅବସରରେ ସ୍ଥାନୀୟ ପ୍ରେସ କ୍ଲବଠାରେ ଏକାଠି ହୋଇଥିଲେ ଓଡ଼ିଆ ସିନେମାର ବହୁ ନାମୀଦାମୀ କଳାକାର ,ନିର୍ଦ୍ଦେଶକ ଓ ପ୍ରଯୋଜକ। ଓଡ଼ିଶା ସରକାର ଆନୁଷ୍ଠାନିକ ଭାବେ ଏପ୍ରିଲ ୨୮ କୁ ଓଡ଼ିଆ ସିନେମା ଦିବସ ରୂପେ ଘୋଷଣା କରନ୍ତୁ ବୋଲି କଳାକାରଙ୍କ ସମେତ ନିର୍ଦ୍ଦେଶକ, ପ୍ରଯୋଜକ ଦାବି କରିଛନ୍ତି । ଏପ୍ରିଲ ୨୮ ,୧୯୩୬ ମସିହାରେ ପ୍ରଥମ ଓଡ଼ିଆ ଚଳଚ୍ଚିତ୍ର ସୀତା ବିବାହ ମୁକ୍ତିଲାଭ କରିଥିଲା । ସେହିଦିନକୁ ମନେପକେଇବା ପାଇଁ ଓ ମନେ ରଖିବା ପାଇଁ ଏପ୍ରିଲ ୨୮କୁ ଓଡ଼ିଆ ସିନେମା ଦିବସ ରୂପେ  ମାନ୍ୟତା ପାଇବା ନେଇ ଦାବି ହେଉଛି ।