ପିପିଲି: ପିପିଲି ବିଧାୟକ ଆଶ୍ରିତ ପଟ୍ଟନାୟକଙ୍କ ଗାଡି ଉପରେ ଆକ୍ରମଣ କରାଯିବା ସହ ତାଙ୍କ ଡ୍ରାଇଭରଙ୍କୁ ମଧ୍ୟ ଆକ୍ରମଣ କରାଯାଇଥିବା ଅଭିଯୋଗ ହୋଇଛି। ମଙ୍ଗଳପୁର ପଞ୍ଚାୟତ ଅନ୍ତର୍ଗତ ବରଜୁପାଟଣା ଗ୍ରାମରେ ଏହି ଘଟଣା ଘଟିଛି।
ସୂଚନା ଅନୁଯାୟୀ, ସୋମବାର ସନ୍ଧ୍ୟା ପ୍ରାୟ ୬ଟାରେ ପୁରୀ ସାଂସଦ ଓ ପିପିଲି ବିଧାୟକ ବରଜୁପାଟଣା ଗ୍ରାମରେ ଆୟୁଷ୍ମାନ କାର୍ଡ ବାଣ୍ଟିବା ସହିତ ଗ୍ରାମବାସୀଙ୍କ ସହ ସେମାନଙ୍କ ସମସ୍ୟା ସମ୍ପର୍କରେ ଆଲୋଚନା କରୁଥିଲେ। ଏହି ସମୟରେ ଗ୍ରାମ ମୁଣ୍ଡରେ ରାସ୍ତା କଡରେ ଠିଆ ହୋଇଥିବା ବିଧାୟକଙ୍କ ଗାଡିକୁ ପଛରୁ ଏକ ବାଇକ୍ ଧକ୍କା ଦେଇଥିଲା। ବିଧାୟକଙ୍କ କାର୍ ଡ୍ରାଇଭର ଟୁଟୁ ପରିଡା ଏ ସଂପର୍କରେ ବାଇକ୍ ଚାଳକକୁ ପଚାରିବାରେ ସେ ହଠାତ୍ ଉତକ୍ଷିପ୍ତ ହୋଇ ଟୁଟୁଙ୍କ ଉପରେ ଆକ୍ରମଣ କରିଥିଲା। ପରେ ଏକ ପ୍ଲାଷ୍ଟିକ୍ ଚୌକି ଆଣି ବିଧାୟକଙ୍କ ଗାଡି ଉପରେ ବାରମ୍ବାର ଆକ୍ରମଣ କରିଥିଲା। ଏହାର ପ୍ରତିବାଦ କରିବାରୁ ସେ ପୁନର୍ବାର ଟୁଟୁଙ୍କ ଉପରେ ଆକ୍ରମଣ କରି ତାଙ୍କୁ ଆହତ କରିଥିଲା। ଖବର ପାଇ ପିପିଲି ପୁଲିସ ଘଟଣାସ୍ଥଳରେ ପହଞ୍ଚି ଆକ୍ରମଣକାରୀ ଯୁବକଙ୍କୁ କାବୁ କରିବା ସହ ତାକୁ ଥାନାରେ ଅଟକ ରଖି ଘଟଣାର ତଦନ୍ତ ଚଳାଇଛି। ଆକ୍ରମଣକାରୀ ଯୁବକର ଘର ଉକ୍ତ ବରଜୁପାଟଣା ଗ୍ରାମରେ ହୋଇଥିବା ବେଳେ ତା’ ବାଇକ୍କୁ ମଧ୍ୟ ପୁଲିସ ଜବତ କରିଛି। ଖବର ଲେଖାଯିବା ପର୍ଯ୍ୟନ୍ତ ଏ ନେଇ ଥାନାରେ କୌଣସି ଲିଖିତ ଅଭିଯୋଗ ହୋଇ ନ ଥିବା ସୂଚନା ମିଳିଛି।
