ସମାଜ ଡିଜିଟାଲ ଡେସ୍କ: ଭାରତ ସହିତ ନ ଲାଗିବାକୁ ପରାମର୍ଶ ଦେଇଛନ୍ତି ପୂର୍ବତନ ପ୍ରଧାନମନ୍ତ୍ରୀ ନଓ୍ବାଜ ଶରିଫ। ଭାରତ ସହ କୌଣସି ପ୍ରକାର ସାମରିକ ଯୁଦ୍ଧ କରିବା ପାକିସ୍ତାନ ପାଇଁ ଅପୂରଣୀୟ କ୍ଷତି ହେବ ବୋଲି ସେ ନିଜ ସାନଭାଇ ତଥା ପ୍ରଧାନମନ୍ତ୍ରୀ ଶେହଓ୍ବାଜ ସରିଫଙ୍କୁ କହିଛନ୍ତି।
ପ୍ରଧାନମନ୍ତ୍ରୀ ଶେହଓ୍ବାଜ ଏବଂ ପଞ୍ଜାବ ପ୍ରଦେଶ ମୁଖ୍ୟମନ୍ତ୍ରୀ ନଓ୍ବାଜଙ୍କ ବାସଭବନକୁ ଯାଇ ତାଙ୍କୁ ଦେଶର ବର୍ତ୍ତମାନର ପରିସ୍ଥିତି ସମୟରେ ଅବଗତ କରାଇଥିଲେ। ପହଲଗାଓଁ ଆକ୍ରମଣକୁ ନେଇ ଭାରତ ପାକିସ୍ତାନକୁ ଦୋଷ ଦେବା ସହିତ ପାକିସ୍ତାନ ବିରୋଧରେ ବିଭିନ୍ନ ପଦକ୍ଷେପ ନେଇଛି। ନଓ୍ବାଜ ସାନ ଭାଇ ଶେହଓ୍ବାଜଙ୍କୁ କହିଥିଲେ, ଭାରତ ସହିତ ଯଥାସମ୍ଭବ କୂଟନୈତିକ ସ୍ତରରେ ଆଲୋଚନା କର। କୌଣସି ପ୍ରକାର ଯୁଦ୍ଧକୁ ଆମନ୍ତ୍ରଣ କରନାହିଁ। ଶାନ୍ତି ସ୍ଥାପନ ପାଇଁ କୂଟନୈତିକ ବ୍ୟବସ୍ଥାର ବ୍ୟବହାର କରିବାକୁ ସେ ପରାମର୍ଶ ଦେଇଥିଲେ।
ସୂଚନାଯୋଗ୍ୟ, ଭାରତ ସିନ୍ଧୁ ନଦୀ ଜଳ ଚୁକ୍ତି ରଦ୍ଦ କରିବା ସହିତ ପାଣି ନ ଛାଡ଼ିବାକୁ ନିଷ୍ପତ୍ତି ନେବା ପରେ ପାକିସ୍ତାନ ପ୍ରତିରକ୍ଷା ମନ୍ତ୍ରୀ ଖଓ୍ବାଜା ଆସିଫ ଭାରତକୁ ଚେତାବନୀ ଦେଇଥିଲେ। ଭାରତ ଯଦି ପାକିସ୍ତାନ ଉପରେ ଆକ୍ରଣ କରେ ଏହାର ଦୃଢ଼ ଜବାବ ଦିଆଯିବ ବୋଲି ସେ କହିଥିଲେ।
