ଆଲୁମିନା ପାଉଡର ଚୋରି,୨ ଗିରଫ
୨ଟି ଟ୍ରାକ୍ଟର, ପିକଅପ୍ ଭ୍ୟାନ ଓ କାର ସହ ୫୦ ହଜାର ଟଙ୍କା ଜବତ
ଲାଞ୍ଜିଗଡ଼: ଲାଞ୍ଜିଗଡ଼ ବ୍ଲକ ଚମ୍ପାଦେଇପୁର ପଞ୍ଚାୟତ ଚନ୍ଦନପୁର ଗ୍ରାମ ନିକଟରୁ ଆଲୁମିନା ପାଉଡର ଚୋରି ଅଭିଯୋଗରେ ୨ ଅଭିଯୁକ୍ତଙ୍କୁ ଲାଞ୍ଜିଗଡ଼ ପୁଲିସ ଗିରଫ କରି କୋର୍ଟ ଚାଲାଣ କରିଛି। ବୁଧବାର ରାତିରେ ଲାଞ୍ଜିଗଡ଼ ପୁଲିସ ପାଟ୍ରୋଲିଂ କରୁଥିବା ସମୟରେ ଲାଞ୍ଜିଗଡ଼ ଥାନାଧିକାରୀ ଜିତେନ୍ଦ୍ର ବିଶ୍ଵାଳ କୌଣସି ସୂତ୍ରରୁ ଆଲୁମିନା ପାଉଡର ଚୋରା ଚାଲାଣ ହେଉଥିବା ଖବର ପାଇଥିଲେ। ଏହା ପରେ ଏସଆଇ ବଳଭଦ୍ର ଗୌଡ ସଦଳବଳ ଘଟଣାସ୍ଥଳରେ ପହଞ୍ଚି ଚମ୍ପାଦେଇପୁର ଗ୍ରାମର ହଳଧର ସାହୁ ଏବଂ ଖମନଖୁଣ୍ଟି ଗ୍ରାମର ବଇଲା କନ୍ଧପାଣିଙ୍କୁ କାବୁ କରିଥିଲେ। ୫ ଟନ ୮ କୁଇଣ୍ଟାଲ ଆଲୁମିନା ପାଉଡର ଲୋଡ ହୋଇଥିବା ୨ଟି ଟ୍ରାକ୍ଟର, ପିକଅପ ଭ୍ୟାନ, ଏକ କାର ସହିତ ନଗଦ ୫୦ ହଜାର ଟଙ୍କା ଜବତ କରିଥିଲେ। ଏ ନେଇ ଏକ ମାମଲା(୧/୨୫) ରୁଜୁ ହୋଇଛି।
Comments are closed.