ଭୁବନେଶ୍ୱର : ଜାନୁଆରୀ ୮ରୁ ୧୦ ତାରିଖ ପର୍ଯ୍ୟନ୍ତ ଓଡ଼ିଶାରେ ପ୍ରଥମ ପ୍ରବାସୀ ଭାରତୀୟ ଦିବସ ପାଳନ ପାଇଁ ପ୍ରସ୍ତୁତି କାର୍ଯ୍ୟ ଜାରି ରହିଛି। ଏହି ପରିପ୍ରେକ୍ଷୀରେ ଐତିହ୍ୟ ଗ୍ରାମ ରଘୁରାଜପୁରରେ ପ୍ରସ୍ତୁତି ପର୍ବ ଆଗେଇ ଚାଲିଛି। ଐତିହ୍ୟ ଗ୍ରାମର ପିଲାଠାରୁ ଯୁବକ ଏବଂ ବରିଷ୍ଠ କାରିଗରମାନେ ବିଭିନ୍ନ ଚିତ୍ରକଳାରେ ସଜେଇ ଚାଲିଛନ୍ତି ।
ସୂଚନା ମୁତାବକ, ଆସନ୍ତା ଜାନୁଆରୀ ୮, ୯ ଏବଂ ୧୦ ତାରିଖରେ ଓଡ଼ିଶାରେ ପ୍ରଥମ ପ୍ରବାସୀ ଭାରତୀୟ ଦିବସ ପାଳନ ହେବାକୁ ଯାଉଛି । ଏହି ପରିପ୍ରେକ୍ଷୀରେ ଓଡ଼ିଶାର ଐତିହ୍ୟ ଗ୍ରାମ ରଘୁରାଜପୁର ପ୍ରବାସୀ ଭାରତୀୟଙ୍କ ଅପେକ୍ଷାରେ ବିଭିନ୍ନ ପ୍ରକାର ପାରମ୍ପରିକ ଚିତ୍ରକଳାରେ ଝଲସିବାରେ ଲାଗିଛି । ଏହି ମହୋତ୍ସବରେ ପ୍ରାୟ ୪୦ରୁ ଊଦ୍ଧ ପାରମ୍ପରିକ ହସ୍ତଶିଳ୍ପୀ କାରିଗର ଭାଗ ନେବା ସହ ବିଭିନ୍ନ ହସ୍ତଶିଳ୍ପର ପ୍ରଦର୍ଶନୀ ଅନୁଷ୍ଠିତ ହେବାକୁ ଯାଉଛି । ଏହି ପ୍ରଦର୍ଶନୀ ଆସନ୍ତା ଜାନୁଆରୀ ୬ରୁ ଆରମ୍ଭ ହୋଇ ୧୦ତାରିଖ ପର୍ଯ୍ୟନ୍ତ ଚାଲିବ ବୋଲି ସୂଚନା ମିଳିଛି। ଏହି ପ୍ରଦର୍ଶନୀକୁ ଐତିହ୍ୟ ଗ୍ରାମର କଳାକ୍ଷେତ୍ର ଏବଂ ଭୁବନେଶ୍ଵରର ୱାଲ୍ମି ଆକ୍ଟ ଅନୁଷ୍ଠାନ ମିଳିତ ଭାବେ ଆୟୋଜନ କରୁଛନ୍ତି ।
ପ୍ରଦର୍ଶନୀରେ ଓଡ଼ିଶାର ପାରମ୍ପରିକ ଚିତ୍ରକଳା, ପଟ୍ଟଚିତ୍ର, ତାଳପତ୍ର, ପିପିଲି ଚାନ୍ଦୁଆ, ପଥର କାରୁକାର୍ଯ୍ୟ ଏବଂ କାଠ ଖୋଦେଇ ହସ୍ତଶିଳ୍ପ ସ୍ଥାନ ପାଇବ ବୋଲି ଆୟୋଜକ କମିଟିର ସଭାପତି ସୁଦର୍ଶନ ସ୍ଵାଇଁ ପ୍ରକାଶ କରିଛନ୍ତି । ପ୍ରଦର୍ଶନୀ ମଧ୍ୟରେ ମହିଳା କାରିଗରମାନେ ଛୋଟ ପିଲାଙ୍କୁ ପ୍ରଶିକ୍ଷଣ ଦେବା ସହ ଅତିଥ୍ଙ୍କ ସାମ୍ନାରେ ବିଭିନ୍ନ ପ୍ରଦର୍ଶନ ହସ୍ତଶିଳ୍ପ ପ୍ରସ୍ତୁତି କରିବେ । ପ୍ରବାସୀ ଭାରତୀୟଙ୍କୁ ଏଠାରେ ପାରମ୍ପରିକ ପୁରି ଖଜା ଏବଂ ଚନ୍ଦନପୁର ପ୍ରସିଦ୍ଧ ଚୁଡ଼ା କଦମ୍, ଡ଼ାଲମା, ଛେନା, ରାବିଡ଼ି ଏବଂ ମାଲପୁଆ ଖାଇବାକୁ ଦିଆଯିବା ପାଇଁ ବ୍ୟବସ୍ଥା ହୋଇଛି । ପ୍ରବାସୀ ଭାରତୀୟମାନେ ଏହି ସମଯରେ ଆସି ପ୍ରଦର୍ଶନୀର ମଜା ଉଠାଇବା ସହ ଐତିହ୍ୟ ଗ୍ରାମ ବୁଲି ଚିତ୍ରକଳା ସମ୍ପର୍କରେ ଜ୍ଞାନ ଆହରଣ କରିବା ସହ କିଣିବାର ସୁଯୋଗ ଉଠାଇ ପାରିବେ ବୋଲି ଆୟୋଜନ କମିଟିର ସମ୍ପାଦକ ବିପିନ ସାହୁ ସୂଚନା ଦେଇଛନ୍ତି।
Comments are closed.