କଲମ୍ବୋ : ମଦ୍ୟପାନ କରି ଗାଡି ଚଳାଉଥିବା ଅଭିଯୋଗରେ ସ୍ଥାନୀୟ ପୁଲିସ ଶ୍ରୀଲଙ୍କା ଟେଷ୍ଟ ଦଳର ଅଧିନାୟକ ଦିମୁଥ୍ କରୁଣାରତ୍ନେଙ୍କୁ ରବିବାର ଗିରଫ କରିଛି। ୩୦ ବର୍ଷୀୟ କରୁଣାରତ୍ନେ ରବିବାର ସକାଳେ ଦ୍ରୁତଗତିରେ କାର୍ ଚଳାଇ ଯାଉଥିବାବେଳେ ସମ୍ମୁଖ ଦିଗରୁ ଆସୁଥିବା ଏକ ଅଟୋକୁ ଧକ୍କା ଦେଇଥିଲେ। ଫଳରେ ଅଟୋ ଡ୍ରାଇଭରଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି। ପୁଲିସ କରୁଣାରତ୍ନେଙ୍କୁ ଗିରଫ କରିବାପରେ ତାଙ୍କର ଡାକ୍ତରୀ ପରୀକ୍ଷା କରାଯାଇଥିଲା। ପ୍ରଚୁର ମଦ୍ୟପାନ କରି ଗାଡି ଚଳାଉଥିବାର ରିପୋର୍ଟ ମିଳିବାପରେ ତାଙ୍କ ବିରୋଧରେ ମାମଲା ରୁଜୁ କରାଯାଇଛି। ବ୍ୟକ୍ତିଗତ ମୁଚାଲିକାରେ ତାଙ୍କୁ ଜାମିନ ପ୍ରଦାନ କରାଯାଇଥିଲେ ସୁଦ୍ଧା ସୋମବାର କରୁଣାରତ୍ନେଙ୍କୁ ଅଦାଲତରେ ହାଜର କରାଯିବ ବୋଲି ପୁଲିସ ପକ୍ଷରୁ କୁହାଯାଇଛି। ଶ୍ରୀଲଙ୍କା କ୍ରିକେଟ ବୋର୍ଡ ଏହି ଘଟଣାକୁ ଗୁରୁତ୍ବର ସହ ଗ୍ରହଣ କରିବା ସହ ଏହାର ତଦନ୍ତ କରାଯିବ ବୋଲି ନିଷ୍ପତ୍ତି ନେଇଛି। ସୂଚନାଯୋଗ୍ୟ ଗତ ଫେବୃଆରୀରେ କରୁଣାରତ୍ନେଙ୍କ ନେତୃତ୍ବାଧୀନ ଶ୍ରୀଲଙ୍କା ଟେଷ୍ଟ ଦଳ ଦକ୍ଷିଣ ଆଫ୍ରିକା ଗସ୍ତରେ ଯାଇ ଟେଷ୍ଟ ସିରିଜ ଜିତିଥିଲା। ଏପରିକି ଆଗାମୀ ବିଶ୍ବକପ ନିମନ୍ତେ କରୁଣାରତ୍ନେଙ୍କୁ ଶ୍ରୀଲଙ୍କା ଦିନିକିଆ ଦଳର ଅଧିନାୟକ ଦାୟିତ୍ବ ଦେବାକୁ ବୋର୍ଡ କର୍ତ୍ତୃପକ୍ଷ ଚିନ୍ତା କରୁଥିବାବେଳେ ଏଭଳି ଘଟଣା ତାଙ୍କୁ ଅସୁବିଧାରେ ପକାଇପାରେ ବୋଲି ଆଶଙ୍କା କରାଯାଉଛି।
