ଗାଜିଆବାଦ : ସ୍ୱାମୀଙ୍କ ମୃତ୍ୟୁ ଖବର ଶୁଣି,ଜୀବନ ହାରିଲେ ସ୍ତ୍ରୀ। ଏମିତି ଏକ ଅଭାବନୀୟ ଘଟଣା ଉତ୍ତରପ୍ରଦେଶର ଗାଜିଆବାଦର ଥାନା ଲୋନୀ ବର୍ଡର ନିକଟରେ ଘଟିଛି। ଲୋନୀ ବର୍ଡର ନିକଟରେ ରହୁଥିବା ଜଣେ ବ୍ୟକ୍ତି ନିଜ ଘରେ ଆତ୍ମହତ୍ୟା କରିଛନ୍ତି। ସ୍ୱାମୀ-ସ୍ତ୍ରୀ ଉଭୟଙ୍କ ମଧ୍ୟରେ ବଚସା ହେବା ପରେ ସ୍ତ୍ରୀ ଦିଲ୍ଲୀ ପଳାଇ ଯାଇଥିଲେ। ଏହାପରେ ବ୍ୟକ୍ତି ଜଣକ ଆତ୍ମହତ୍ୟା କରିଥିବା ଜଣାପଡିଛି। ସ୍ୱାମୀଙ୍କ ଆତ୍ମହତ୍ୟା ଖବର ପାଇବା ପରେ ପତ୍ନୀ ମଧ୍ୟ ନିଜ ବାପା ଘରେ ଆତ୍ମହତ୍ୟା କରିଛନ୍ତି। ଉଭୟଙ୍କ ମଧ୍ୟରେ କୌଣସି କଥାକୁ ନେଇ ବିବାଦ ପରେ ମହିଳା ଜଣକ ନିଜ ବାପ ଘରକୁ ପଳାଇ ଆସିବା ପରେ ପ୍ରଥମେ ତାଙ୍କ ସ୍ୱାମୀ ପରେ ମହିଳା ଜଣକ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡିଛି।
ଗାଜିଆବାଦର ଲୋନୀ ବର୍ଡର କ୍ଷେତ୍ରରେ ଜବାହର ନଗର ବ୍ଲକ୍ରେ ରହୁଥିବା ଜଣେ ବାସିନ୍ଦା କହିଛନ୍ତି, ତାଙ୍କ ପଡୋଶୀ ଭାବେ ରହୁଥିବା ବିଜୟ ପ୍ରତାପ ଚୌହ୍ୱାନ ନିଜ ପତ୍ନୀ ଶିବାନୀଙ୍କ ସହ ରହୁଥିଲେ। ଶୁକ୍ରବାର ସନ୍ଧ୍ୟାରେ ଉଭୟଙ୍କ ମଧ୍ୟରେ କଳହ ହେବା ପରେ ଶିବାନୀ ଘର ଛାଡି ପଳାଇଥିଲେ। ବିଜୟ ନିଜ ପତ୍ନୀଙ୍କୁ ଫୋନ୍ କରି କହିଥିଲେ ସେ ଆଉ ତାଙ୍କ ମୁହଁ ଦେଖିପାରିବେନି। କିଛି ସମୟ ପରେ ବିଜୟଙ୍କ ଜଣେ ସମ୍ପର୍କୀୟ ଆସି ଦେଖିଥିଲେ, ସେ ରଶି ଲଗାଇ ଆତ୍ମହତ୍ୟା କରିଛନ୍ତି। ସମ୍ପର୍କୀୟ ଶିବାନୀଙ୍କୁ ଘଟଣା ବିଷୟରେ ଜଣାଇବା ପରେ ଶିବାନୀ ମଧ୍ୟ ଦିଲ୍ଲୀରେ ଆତ୍ମହତ୍ୟା କରିଥିଲେ। ଉଭୟଙ୍କ ଏକ ବର୍ଷର ଶିଶୁ କନ୍ୟା ରହିଛି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି।
