ନୂଆଦିଲ୍ଲୀ: ଉତ୍ତରପ୍ରଦେଶର ଆମେଥି ଓ ରାୟବରେଲୀ ଭଳି ଭିଭିଆଇପି ଆସନ ପାଇଁ କଂଗ୍ରେସ ପକ୍ଷରୁ ପ୍ରାର୍ଥୀ ଘୋଷଣା ହୋଇନଥିବା ବେଳେ ଏଠାରୁ ଦଳ କାହାକୁ ଟିକେଟ ଦେବ ତାହାକୁ ନେଇ ଅନିଶ୍ଚିତତା ଲାଗି ରହିଛି। ଏହାରି ଭିତରେ କଂଗ୍ରେସ ସାଧାରଣ ସମ୍ପାଦକ ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସ୍ୱାମୀ ଭବର୍ଟ ଭଦ୍ରା ଆମେଥି ଆସନରୁ ନିର୍ବାଚନ ଲଢିବା ଲାଗି ଇଚ୍ଛା ପ୍ରକାଶ କରିଛନ୍ତି। ସକ୍ରିୟ ରାଜନୀତିକୁ ରବର୍ଟ ଭଦ୍ରା ଆସିବା ନେଇ ଏକ ସଙ୍କେତ ଦେଇଛନ୍ତି। ଏକ ସାକ୍ଷାତକାରରେ ରବର୍ଟ ଭଦ୍ରା କହିଛନ୍ତି ଯେ ଆମେଥିର ଲୋକମାନେ ବର୍ତ୍ତମାନର ସାଂସଦଙ୍କ ଉପରେ ଅସନ୍ତୁଷ୍ଟ ଅଛନ୍ତି। ଏପରିକି ବର୍ତ୍ତମାନର ପ୍ରତିନିଧିଙ୍କୁ ନିର୍ବାଚିତ କରି ସେମାନେ ବଡ ଭୁଲ କରିଥିବା କହୁଛନ୍ତି। ରବର୍ଟ କହିଛନ୍ତି ଆମେଥିବାସୀ ତାଙ୍କୁ ନିଜର ପ୍ରତିନିଧି ଭାବେ ଚାହାଁନ୍ତି।
୨୦୧୯ରେ ସ୍ମୃତି ଇରାନୀ ଆମେଥିରୁ ରାହୁଲଙ୍କ ବିପକ୍ଷରେ ଲଢି ନିର୍ବାଚିତ ହୋଇଥିଲେ। ଗାନ୍ଧୀ ପରିବାରର ଦୁର୍ଗ ଭାବେ ପରିଚିତ ଆମେଥି ଆସନରୁ ୨୦୧୯ ନିର୍ବାଚନରେ ରାହୁଲ ଗାନ୍ଧୀ ପରାଜିତ ହୋଇଥିଲେ। ପୂର୍ବରୁ ରାହୁଲ ଗାନ୍ଧୀ ୨୦୦୪, ୨୦୦୯ ଏବଂ ୨୦୧୪ରେ ଲାଗତାର ଏହି ଆସନରୁ ବିଜୟୀ ହୋଇଥିଲେ। ଚଳିତ ନିର୍ବାଚନରେ ରାହୁଲଙ୍କୁ ପୁନର୍ବାର ଆମେଥିରୁ ନିର୍ବାଚନ ଲଢିବା ଲାଗି ଉତ୍ତରପ୍ରଦେଶବାସୀ ନିବେଦନ କରିଥିଲେ। ମାତ୍ର ରାହୁଲ କେରଳର ୱାୟନାଡରୁ ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି। ରାୟବରେଲିରେ ସୋନିଆ ଗାନ୍ଧୀ ପ୍ରତିନିଧିତ୍ୱ କରୁଥିବା ବେଳେ ସେ ପ୍ରତ୍ୟକ୍ଷ ରାଜନୀତି ଛାଡି ରାଜ୍ୟସଭାକୁ ନିର୍ବାଚିତ ହୋଇଛନ୍ତି। କୁହାଯାଉଛି ଏଥର ପ୍ରିୟଙ୍କା ଗାନ୍ଧୀ ଭଦ୍ରା ରାୟବରେଲିରୁ ପ୍ରାର୍ଥୀ ହୋଇପାରନ୍ତି।
Comments are closed.