ଚେନ୍ନାଇ : ତାମିଲନାଡୁ ରାଜ୍ୟପାଳ ବନୱାରୀଲାଲ ପୁରୋହିତଙ୍କ ବିରୋଧରେ ଆପତ୍ତିଜନକ ଆଲେଖ୍ୟ ଲେଖିବା ଅଭିଯୋଗରେ ତାମିଲ ସାପ୍ତାହିକ ପତ୍ରିକା ‘ନାଖୀରାନ’ର ସମ୍ପାଦକ ଆର୍. ଆର୍. ଗୋପାଳଙ୍କୁ ପୁଲିସ ମଙ୍ଗଳବାର ଗିରଫ କରିଛି। ଉକ୍ତ ଆଲେଖ୍ୟଟି ମଦୁରାଇ କାମରାଜ ବିଶ୍ୱବିଦ୍ୟାଳୟ ଯୌନ କେଳେଙ୍କାରୀ ଉପରେ ଆଧାରିତ ଥିଲା। ଅଭିଯୋଗ ଅନୁସାରେ ଅଧିକ ନମ୍ବର ଦେବାର ପ୍ରଲୋଭନ ଦେଖାଇ ବିଶ୍ୱବିଦ୍ୟାଳୟର କେତେକ ପ୍ରଫେସର ଛାତ୍ରୀଙ୍କୁ ବଳାତ୍କାର କରିଥିଲେ। ନିର୍ମଳା ଦେବୀ ନାମ୍ନୀ ଜଣେ ମହିଳା ବିଶ୍ୱବିଦ୍ୟାଳୟର ଅଧିକାରୀମାନଙ୍କ ଯୌନ କ୍ଷୁଧା ମେଣ୍ଟାଇବା ପାଇଁ ଛାତ୍ରୀମାନଙ୍କୁ ବାଧ୍ୟ କରୁଥଲେ। ଏ ନେଇ କେତେକ ଛାତ୍ରୀଙ୍କ ସହିତ ଟେଲିଫୋନ୍ ଯୋଗେ ତାଙ୍କ ବାର୍ତ୍ତାଳାପର ରେକର୍ଡିଂ ଭାଏରାଲ ହେବା ପରେ ଏହି ଘଟଣାର ପର୍ଦାଫାସ ହୋଇଥିଲା। ତେବେ ଉକ୍ତ ବିଶ୍ୱବିଦ୍ୟାଳୟର କୂଳପତି ଥିବା ରାଜ୍ୟପାଳ ବନୱାରୀ ଲାଲ ଏବଂ ତାଙ୍କ ମୁଖ୍ୟ ସଚିବ ଆର୍. ରାଜଗୋପାଳଙ୍କୁ ସେ ସାକ୍ଷାତ କରିଥିବା ଘଟଣା ନିର୍ମଳା ଦେବୀ ସ୍ୱୀକାର କରିଛନ୍ତି ବୋଲି ଜଣେ ପୁଲିସ ଅଧିକାରୀ ପ୍ରକାଶ କରିଥିବା ଗୋପାଳ ତାଙ୍କ ଆଲେଖ୍ୟରେ ଉଲ୍ଲେଖ କରିଥିଲେ। କିନ୍ତୁ ଏହି ମାମଲାରେ ବନୱାରୀ ଲାଲଙ୍କ ବିରୋଧରେ ତଦନ୍ତ ହୋଇ ନ ଥିବା ଗୋପାଳ ଅଭିଯୋଗ ଦର୍ଶାଇଥିଲେ। ଏହା ବିରୋଧରେ ରାଜ୍ୟପାଳଙ୍କ କାର୍ଯ୍ୟାଳୟ ପକ୍ଷରୁ ଅଭିଯୋଗ ପାଇବା ପରେ ଚେନ୍ନାଇ ପୁଲିସ ଗୋପାଳଙ୍କୁ ପୂର୍ବାହ୍ଣରେ ଚେନ୍ନାଇ ବିମାନବନ୍ଦରରୁ ଗିରଫ କରିଛି। ଗୋପାଳ ବିମାନ ଯୋଗେ ପୁଣେ ଚାଲିଯିବାକୁ ଉଦ୍ୟମ କରୁଥିଲେ ବୋଲି ପୁଲିସ ପ୍ରକାଶ କରିଛି।
