ଭାରସାମ୍ୟ ହରାଇ ଓଲଟିଲା କାର, ଗୋଟିଏ ପରିବାରର ୪ ଗୁରୁତର

କଲ୍ୟାଣସିଂହପୁର : ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ବୁଡ଼ାଗୁଡା ପଞ୍ଚାୟତର ଗୁରୁତୁଲୀ ଓ କଣ୍ଡାକରା ଗ୍ରାମ ମଝିରେ  ଭାରସାମ୍ୟ ହରାଇ ଓଲଟିଲା କାର। ଏହି ଦୁର୍ଘଟଣାରେ ଗୋଟିଏ ପରିବାରର ଚାରି ଜଣ ଗୁରୁତର ହୋଇଛନ୍ତି। କାଶୀପୁର ସଦରରୁ ଗୌଡ଼ ସାହିର ହରିଶ୍ଚନ୍ଦ୍ର ଗୌଡ଼ ନିଜସ୍ବ ଗାଡିରେ ଦୁଇ ଝିଅ ସହ ସ୍ୱାମୀ ସ୍ତ୍ରୀ ବାହାରି କଲ୍ୟାଣସିଂହପୁର ବ୍ଲକ ସେରିଗୁମ୍ମା ପଞ୍ଚାୟତର ଲକାପାଇ ଗ୍ରାମକୁ ଯାଉଥିଲେ। ନିଜେ ହରିଶ୍ଚନ୍ଦ୍ର ଗାଡି ଚାଳନା କରି ଆସୁଥିବା ବେଳେ ଗୁରୁତୁଲୀ ଓ କଣ୍ଡାକରା ଗ୍ରାମ ମଝିରେ ଦୁର୍ଘଟଣା ହୋଇଥିଲା। ଅଞ୍ଚଳର କିଛି ଲୋକ ଦେଖି ରୋଗିବୁହା ଗାଡିକୁ ଯୋଗାଯୋଗ କରିଥିଲେ। ଗାଡି ଉପଲବ୍ଧ ନଥିବାରୁ ପୁଲିସକୁ ସୂଚନା ଦେଇଥିଲେ। ଉକ୍ତ ଘଟଣାର ଖବର ପାଇ ଥାନା ଅଧିକାରୀ ନୀଳକଣ୍ଠ ବେହେରା ମାନବିକତା ଦେଖାଇ ପୁଲିସ ଗାଡ଼ିରେ ୪ଜଣ ଆହତଙ୍କୁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ଏଠାରେ ଡାକ୍ତର ପ୍ରମୋଦ କୁମାର ମିଶ୍ର ପ୍ରାଥମିକ ଚିକିତ୍ସା କରି ରାୟଗଡ଼ା ସ୍ୱାସ୍ଥ୍ୟ କେନ୍ଦ୍ରକୁ ପଠାଇ ଦେଇଛନ୍ତି।