ନୂଆଦିଲ୍ଲୀ : ଲୋକସଭା ନିର୍ବାଚନ ପାଇଁ ବିଜେପି ମଙ୍ଗଳବାର ଦଶମ ପ୍ରାର୍ଥୀ ତାଲିକା ପ୍ରକାଶ କରିଛି। ଏଥିରେ ୩୯ ଜଣ ପ୍ରାର୍ଥୀଙ୍କ ନାମ ରହିଛି। ତାଲିକାରେ ୨୯ ଜଣଙ୍କ ନାମ ଉତ୍ତରପ୍ରଦେଶର ଏବଂ ୧୦ ଜଣଙ୍କ ନାମ ପଶ୍ଚିମବଙ୍ଗର। କେନ୍ଦ୍ର ମନ୍ତ୍ରୀ ମେନକା ଗାନ୍ଧୀଙ୍କୁ ସୁଲତାନପୁରୁ ଓ ବରୁଣ ଗାନ୍ଧୀଙ୍କୁ ପିଲିଭିତରୁ ପ୍ରାର୍ଥୀ କରାଯାଇଛି। କିନ୍ତୁ ଚଳିତ ଥର ମା’-ପୁଅଙ୍କ ଲୋକସଭା ଆସନ ବଦଳାଇ ଦିଆଯାଇଛି। କାନପୁରରୁ ମୂରଲୀ ମନୋହର ଯୋଶୀଙ୍କ ଟିକେଟ କାଟି ଦିଆଯାଇଛି। ତାଙ୍କ ସ୍ଥାନରେ ସତ୍ୟଦେବ ପଚୌରୀଙ୍କୁ ଟିକେଟ ପ୍ରଦାନ କରାଯାଇଛି। ରୀତା ବହୁଗୁଣା ଯୋଶୀଙ୍କୁ ପ୍ରୟାଗରାଜ ଲୋକସଭା ଆସନରୁ ପ୍ରାର୍ଥୀ କରାଯାଇଛି। ଉତ୍ତରପ୍ରଦେଶର ୨୯ ଲୋକସଭା ଆସନରୁ ୨୨ ଜଣ ବର୍ତ୍ତମାନର ସାଂସଦଙ୍କୁ ପ୍ରାର୍ଥୀ କରାଯାଇଛି। ପଶ୍ଚିମବଙ୍ଗର ୧୦ ଲୋକସଭା ଆସନରୁ ୯ ଜଣ ନୂଆ ଲୋକଙ୍କୁ ପ୍ରାର୍ଥୀ କରାଯାଇଛି।
