ସମାଜ ଡିଜିଟାଲ ଡେସ୍କ: ଯବାନଙ୍କ ଗୁଳିରେ ନିହତ ହୋଇଛନ୍ତି ୯ ମାଓବାଦୀ। ଛତିଶଗଡ଼ର ଦନ୍ତେଓ୍ବାଡ଼ା ଏବଂ ବିଜାପୁର ସୀମାନ୍ତ ଜଙ୍ଗଲରେ ମଙ୍ଗଳବାର ପୂର୍ବାହ୍ନରେ ଗୁଳିବିନିମୟ ସମୟରେ ଯବାନଙ୍କୁ ଏହି ସଫଳତା ମିଳିଛି। ଅପରାହ୍ନ ସୁଦ୍ଧା ଗୁଳିବିନିମୟ ଜାରି ରହିଥିବା ସୂଚନା ମିଳିଛି।
ବସ୍ତର ଆଇଜି ପି. ସୁନ୍ଦରରାଜ କହିଛନ୍ତି, ଦନ୍ତେଓ୍ବାଡ଼ା ଏବଂ ବିଜାପୁର ଜିଲା ସୀମାନ୍ତବର୍ତ୍ତୀ ଜଙ୍ଗଲରେ ମାଓବାଦୀମାନେ ଲୁଚି ରହିଥିବା ଗୁଇନ୍ଦା ସୂଚନା ମିଳିଥିଲା। ଏହା ପରେ ଜିଲା ସଂରକ୍ଷିତ ବାହିନୀ(ଡିଆରଜି) ଏବଂ କେନ୍ଦ୍ରୀୟ ସଂରକ୍ଷିତ ପୁଲିସ ବାହିନୀ(ସିଆରପିଏଫ)ର ଏକ ମିଳିତ ଟିମକୁ କୋମ୍ବିଂ ଅପରେସନ ପାଇଁ ପଠାଯାଇଥିଲା। ପୂର୍ବାହ୍ନ ପ୍ରାୟ ସାଢ଼େ ୧୦ଟାରେ ଯବାନ ଏବଂ ମାଓବାଦୀ ମୁହାଁମୁହିଁ ହୋଇଥିଲେ। ଉଭୟ ପକ୍ଷ ମଧ୍ୟରେ ଦୀର୍ଘ ସମୟ ଯାଏ ଗୁଳିବିନିମୟ ଜାରି ରହଇଥିଲା। ଘଟଣାସ୍ଥଳରୁ ୯ ମାଓବାଦୀଙ୍କ ମୃତହେଦ ଜବତ ହୋଇଛି। ଏହା ସହିତ ବହୁ ଅସ୍ତ୍ରଶସ୍ତ୍ର ମଧ୍ୟ ମିଳିଛି। ଛତିଶଗଡ଼ରେ ମାଓବାଦୀ ଦମନ ଅଭିଯାନ ସମୟରେ ବିଗତ ୩ ମାସରେ ମଧ୍ୟରେ ୩୫ ମାଓବାଦୀ ନିହତ ହୋଇଛନ୍ତି ଏବଂ ବହୁ ସଂଖ୍ୟାରେ ଆତ୍ମସମର୍ପଣ କରିଛନ୍ତି।
