ଅଷ୍ଟ୍ରେଲିଆ ସମ୍ମୁଖରେ ଭାରତର ବିଶାଳ ସ୍କୋର : ୬୨୨ ରନ୍ କରି ପାଳି ଘୋଷଣା
ସିଡନୀ: ଅଷ୍ଟ୍ରେଲିଆର ସିଡନୀ କ୍ରିକେଟ୍ ଗ୍ରାଉଣ୍ଡରେ ଗୁରୁବାର ଠାରୁ ଆରମ୍ଭ ହୋଇଥିବା ଭାରତ- ଅଷ୍ଟ୍ରେଲିଆ ମଧ୍ୟରେ ଚତୁର୍ଥ ତଥା ଅନ୍ତିମ ଟେଷ୍ଟରେ ଦୃଢ଼ ସ୍ଥିତିରେ ରହିଛି ଭାରତ । ଚତୁର୍ଥ ତଥା ଅନ୍ତିମ ଟେଷ୍ଟର ଦ୍ବିତୀୟ ଦିନ ଖେଳ ଶେଷ ସୁଦ୍ଧା ଭାରତ ୬୨୨ ରନରେ ପ୍ରଥମ ପାଳି ଘୋଷଣା କରିଥିଲା। ଚେତେଶ୍ୱର ପୂଜାରାଙ୍କ ୧୯୩ ରନ୍, ରିଷଭ୍ ପନ୍ଥଙ୍କ ଅପରାଜିତ ୧୫୯ ରନ ଓ ଜାଡ଼େଜାଙ୍କ ୮୧ ରନ୍ କୁ ଆଧାର କରି ଭାରତ ୭ ୱିକେଟ୍ ହରାଇ ୬୨୨ ରନ୍ ସଂଗ୍ରହ କରିଛି । ପୂଜାରା ୩୭୩ ବଲରୁ ୨୨ଟି ଚଉକା ବଳରେ ୧୯୩ ରନ୍ କରିଛନ୍ତି। ସେହିପରି ରିଷଭ୍ ପନ୍ଥ ୧୮୯ ବଲରୁ ଗୋଟିଏ ଛକା ଓ ୧୫ଟି ଚଉକା ବଳରେ ୧୫୯ ରନ୍ କରି ଅପରାଜିତ ରହିଥିଲେ । ଅନ୍ୟପଟେ ରବୀନ୍ଦ୍ର ଜାଡ଼େଜା ୧୧୪ ବଲରେ ୮୧ ରନର ଉପଯୋଗୀ ଇନିଂସ ଖେଳିଛନ୍ତି । ଜାଡ଼େଜା ଗୋଟିଏ ଛକା ଓ ୭ଟି ଚଉକା ମାରିଥିଲେ । ଅନ୍ୟପଟେ ଓପନିଂ ପାଇଁ ଆସିଥିବା ମୟଙ୍କ ଅଗ୍ରୱାଲ୍ ୧୧୨ ବଲରେ ୨ଟି ଛକା ଓ ୭ଟି ଚଉକା ସହ ୭୭ ରନର ଇନିଂସ ଖେଳିଥିଲେ । ଅଷ୍ଟ୍ରେଲିଆ ପକ୍ଷରୁ ନେଥନ ଲିଅନ ସର୍ବାଧିକ ୪ଟି ୱିକେଟ୍ ନେଇଥିବା ବେଳେ ଜୋଶ୍ ହେଜେଲ୍ଉଡ୍ ୨ଟି ଓ ମିଚେଲ ଷ୍ଟାର୍କ ଗୋଟିଏ ୱିକେଟ୍ ନେଇଥିଲେ। ଭାରତୀୟ ଦଳର ପାଳି ଘୋଷଣା ପରେ ଘରୋଇ ଅଷ୍ଟ୍ରେଲିଆ ବ୍ୟାଟିଂ ଆରମ୍ଭ କରି ୧୦ ଓଭର ସୁଦ୍ଧା କୌଣସି ୱିକେଟ୍ ନହରାଇ ୨୪ ରନ୍ କରିଛି ।
