ମୁମ୍ବଇ : ବଲିଉଡରେ ନବାଗତ ଅଭିନେତ୍ରୀଙ୍କ ଭିଡ଼ ବଢ଼ିଥିବାବେଳେ ପ୍ରତିଯୋଗିତା ମଧ୍ୟ ଜୋର୍ସୋର୍ରେ ଚାଲିଛି। ସେମାନଙ୍କ ମଧ୍ୟରୁ ଅନ୍ୟତମ ହେଲେ ପୂଜା ବେଦୀଙ୍କ ଝିଅ ଆଲିୟା ବେଦୀ। ନିତିନ୍ କକ୍କଡ଼ଙ୍କ ହାସ୍ୟରସାତ୍ମକ ଚଳଚ୍ଚିତ୍ର ‘ଜୱାନି ଜାନେମନ୍’ରେ ସେ କ୍ୟାରିୟର ଆରମ୍ଭ କରିବାକୁ ଯାଉଛନ୍ତି। ଆଲିୟାଙ୍କ ସହ ଏଥିରେ ବଲିଉଡର ନବାବ୍ ସୈଫ୍ ଅଲୀ ଖାନ୍ ଦେଖାଦେବେ। ଏହି ଚଳଚ୍ଚିତ୍ରରେ ସେ ଜଣେ ମୁସଲିମ୍ ଯୁବତୀ ଭୂମିକାରେ ଅବତୀର୍ଣ୍ଣ। ଏଣୁ ଉର୍ଦୁ ଶିଖିବାକୁ ତାଙ୍କୁ କୁହାଯାଇଛି। ଗତ ଦେଢ଼ ମାସ ହେଲା ଆଲିୟା ଉର୍ଦୁ ତାଲିମ ନେଉଛନ୍ତି। ନିୟମିତ ଭାବେ ସେ ଏସବୁର ଭିଡିଓ ଦେଖିବା ସହ ୨ଘଣ୍ଟା ପ୍ରଶିକ୍ଷଣ ନେଉଥିବାର ପ୍ରକାଶ। ନ୍ୟୁୟର୍କରୁ ଉଚ୍ଚ ଶିକ୍ଷା ଲାଭ କରିଥିବା ଆଲିୟାଙ୍କୁ ୨ ବର୍ଷ ତଳେ ଆଦିତ୍ୟ ଚୋପ୍ରା ପ୍ରଯୋଜନା ସଂସ୍ଥା ପ୍ରଥମେ ଅଫର୍ ଦେଇଥିଲା କିନ୍ତୁ ସେ ସମୟରେ ଆଲିୟା ନିଜ ପାଠପଢ଼ାକୁ ଅଧିକ ପ୍ରାଧାନ୍ୟ ଦେଇଥିଲେ। ତାଙ୍କ ମତରେ ଯଥା ସମୟ ଏବେ ଆରମ୍ଭ ହୋଇଛି।
