ଲଣ୍ଡନ: ବ୍ରିଟେନରେ ପଲ୍ ସ୍କେଗ୍ ନାମକ ଜଣେ କରୋନା ସଂକ୍ରମିତ ବ୍ୟକ୍ତିଙ୍କ ସମ୍ପୂର୍ଣ୍ଣ ଶରୀର ଅଚଳ ହୋଇଯାଇଥିଲା। ୧୧ ଦିନ ଧରି ଏହି ଅବସ୍ଥାରେ ରହିବା ପରେ ଶେଷରେ ପଲ୍ ସ୍କେଗ୍ ସୁସ୍ଥ ହୋଇଛନ୍ତି ଓ ନିଜ ଗୋଡ଼ରେ ଚାଲି ଚାଲି ଡାକ୍ତରଖାନାରୁ ବାହାରିଛନ୍ତି। ଏହି ସମୟରେ ଡାକ୍ତରଖାନା କର୍ମଚାରୀମାନେ ତାଳି ବଜାଇ ତାଙ୍କୁ ବିଦା କରିଛନ୍ତି।
ସୂଚନା ଅନୁସାରେ, କିଛିଦିନ ପୂର୍ବରୁ ପଲ୍ଙ୍କ ନିର୍ବନ୍ଧ ହୋଇଥିଲା। ସୁସ୍ଥ ହେବା ପରେ ତାଙ୍କ ଭାବି ପତ୍ନୀ ଲେଭେଣ୍ଡର୍ ପୁଷ୍ପଗୁଚ୍ଛ ସହ ପଲ୍ଙ୍କୁ ସ୍ୱାଗତ କରିଛନ୍ତି। ହସ୍ପିଟାଲର ଡାକ୍ତର ଜୋନାଥନଙ୍କ କହିବାନୁସାରେ, ଏଭଳି ଖୁବ୍ କମ୍ ମାମଲାରେ ହୋଇଥାଏ, ଯେତେବେଳେ କରୋନା କାରଣରୁ ଶରୀର ଅଚଳ(ପାରାଲାଇଜ୍) ହୋଇଯାଏ। ସେ ସୁସ୍ଥ ହେବା କୌଣସି ଚମତ୍କାରରୁ କମ୍ ନୁହେଁ। ପଲ୍ ଭେଣ୍ଟିଲେଟରରେ ଥିଲେ। ତାଙ୍କ ଚିକିତ୍ସାରେ ଇମ୍ୟୁନୋଗ୍ଲୋବ୍ଲିନ୍ର ବ୍ୟବହାର କରାଯାଇଥିଲା, ଯାହା ଏକ ପ୍ରକାରର ପ୍ଲାଜ୍ମା। ଯଦି ଏହି ଥେରାପି ନ ଆପଣା ଯାଇଥାଆନ୍ତା ତେବେ ହୁଏତ ପଲ୍ ସୁସ୍ଥ ହୋଇପାରି ନ ଥାଆନ୍ତେ।
ଉଲ୍ଲେଖଯୋଗ୍ୟ, ପଲ୍ଙ୍କର ୩ ଏପ୍ରିଲରେ ଶ୍ୱାସକ୍ରିୟାରେ ସମସ୍ୟା ଦେଖା ଦେବାରୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ପରୀକ୍ଷା ପରେ ସେ କରୋନା ସଂକ୍ରମିତ ବୋଲି ଜଣାପଡ଼ିଥିଲା। ପରେ ତାଙ୍କ ଶରୀରର କିଛି ଭାଗ କାମ କରିବା ବନ୍ଦ କରି ଦେଇଥିଲା। ପଲ୍ ଓ ତାଙ୍କ ଭାବି ପତ୍ନୀ ଲେଭେଣ୍ଡର୍ ଉଭୟ ନେସ୍ନାଲ୍ ହେଲ୍ଥ ସର୍ଭିସରେ ରେଡିଓଗ୍ରାଫର୍ କାମ କରନ୍ତି। ଖୁବ୍ଶୀଘ୍ର ଆମେ କାର୍ଯ୍ୟରେ ଯୋଗ ଦେଇ କରୋନା ସଂକ୍ରମିତମାନଙ୍କୁ ସାହାଯ୍ୟ କରିବାକୁ ଚାହୁଁଛୁ ବୋଲି ଲେଭେଣ୍ଡର ସାମାଜିକ ଗଣମାଧ୍ୟମ ଜରିଆରେ ସୂଚନା ଦେଇଛନ୍ତି।
