ମୋରଦାବାଦ : ତତ୍କାଳ ତିନି ତଲାକକୁ ସର୍ବୋଚ୍ଚ ଅଦାଲତ ବେଆଇନ ଘୋଷଣା କରିବା ସତ୍ତ୍ବେ ମୁସଲମାନ ମହିଳାମାନେ ଏହି ପ୍ରଥାଜନିତ ନିର୍ଯାତନାରୁ ମୁକ୍ତି ପାଇପାରୁ ନାହାନ୍ତି। ଖୁବ୍ଜୋର୍ରେ ଗୀତ ବଜାଇବା ଭଳି ସାମାନ୍ୟ କାରଣକୁ ଭିତ୍ତି କରି ଜଣେ ମହିଳାଙ୍କୁ ତିନି ତଲାକ ଦେଇଛନ୍ତି ତାଙ୍କ ସ୍ୱାମୀ। ଏତିକିରେ ଶେଷ ହୋଇ ନାହିଁ ସମ୍ପୃକ୍ତ ମହିଳାଙ୍କ ପ୍ରତି ଅକଥନୀୟ ଅତ୍ୟାଚାରର ଧାରା। ତିନି ତଲାକ ପରେ ତାଙ୍କୁ ଗଣବଳାତ୍କାର କରାଯାଇଥିବା ଅଭିଯୋଗ ହୋଇଛି। ଏପରିକି ସ୍ୱାମୀ ତାଙ୍କୁ ଯେଭଳି ପୁନର୍ବାର ପତ୍ନୀ ଭାବେ ଗ୍ରହଣ କରିପାରିବେ ସେଥିନେଇ ତାଙ୍କୁ ମୁସଲମାନ ଧର୍ମରେ ପ୍ରଚଳିତ ନିକାହ ହଲାଲ ପରମ୍ପରା ପାଳନ କରିବାକୁ ବାଧ୍ୟ କରାଯାଇଛି ବୋଲି ଉତ୍ତର ପ୍ରଦେଶର ସମ୍ପୃକ୍ତ ମହିଳା ମୋରଦାବାଦ ପୁଲିସ ନିକଟରେ ଅଭିଯୋଗ କରିଛନ୍ତି। ପୁଲିସ ତାଙ୍କ ଅଭିଯୋଗକୁ ଉପରେ ଏକ ମାମଲା ରୁଜୁ କରି ତଦନ୍ତ ଚଳାଇଛି।
