ଯୁଦ୍ଧରେ ନିହତ ସୁରକ୍ଷାକର୍ମୀଙ୍କ ପାଇଁ ସହାୟତା ପରିମାଣ ୧ କୋଟିକୁ ବୃଦ୍ଧି କଲେ ହରିୟାଣା ସରକାର

ଡେସ୍କ: ହରିୟାଣା ସରକାର ସଶସ୍ତ୍ର ବାହିନୀର ଯବାନ ଏବଂ କେନ୍ଦ୍ରୀୟ ସଶସ୍ତ୍ର ପୋଲିସ ବାହିନୀ ଯବାନଙ୍କ ପରିବାରକୁ ପ୍ରଦାନ କରାଯାଉଥିବା ସହାୟତା ପରିମାଣ ସଂଶୋଧନକୁ ଶନିବାର ଅନୁମୋଦନ କରିଛନ୍ତି। ଅନୁକମ୍ପା ରାଶି ୫୦ ଲକ୍ଷରୁ ୧ କୋଟି ଟଙ୍କାକୁ ବୃଦ୍ଧି କରାଯାଇଛି। ସେହିପରି ହିନ୍ଦୀ ଆନ୍ଦୋଳନ-୧୯୫୭ର ମାତୃଭାଷା ସତ୍ୟାଗ୍ରହୀଙ୍କ ମାସିକ ପେନସନ୍ ୧୫ ହଜାରରୁ ୨୦ ହଜାର ଟଙ୍କାକୁ ବୃଦ୍ଧି କରିବା ସହ ରାଜ୍ୟ କର୍ମଚାରୀଙ୍କ ପାଇଁ ମୃତ୍ୟୁ ସହ ଅବସର ଗ୍ରାଚ୍ୟୁଇଟିର ସର୍ବାଧିକ ସୀମା ୨୦ ଲକ୍ଷରୁ ୨୫ ଲକ୍ଷ ଟଙ୍କାକୁ ବୃଦ୍ଧି କରିଛନ୍ତି ସରକାର। ହରିୟାଣା ଲୋକସେବା ଆୟୋଗ ଦ୍ୱାରା ପରିଚାଳିତ ଗ୍ରୁପ୍ ଏ ଏବଂ ବି ପରୀକ୍ଷାରେ ଅଂଶଗ୍ରହଣ କରୁଥିବା ପ୍ରାର୍ଥୀମାନଙ୍କ ପାଇଁ ଆଧାର ପ୍ରମାଣୀକରଣ ସେବାକୁ ମଧ୍ୟ ଅନୁମୋଦନ କରାଯାଇଛି।