ସମାଜ ଲାଇଭ ଡ଼େସ୍କ : ଗୋଆ ନାଇଟ୍ କ୍ଲବ୍ ଅଗ୍ନିକାଣ୍ଡ ଘଟଣାରେ କ୍ଲବ୍ ମାଲିକଙ୍କ ବିରୋଧରେ ମାମଲା ରୁଜୁ । ସୂଚନା ଦେଲେ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ । ଗୋଆ ରାଜଧାନୀ ପାଣାଜୀଠାରୁ ୨୫ କିମି ଦୂରରେ ଅବସ୍ଥିତ ଆରପୋରା ଗ୍ରାମରେ ଥିବା ଏକ ନାଇଟ୍ କ୍ଲବ୍ ରେ ଅଗ୍ନିକାଣ୍ଡ ଘଟି ଏପର୍ଯ୍ୟନ୍ତ ୨୫ ଜଣଙ୍କ ମୃତ୍ୟୁ ହୋଇଥିବା ସୂଚନା ରହିଛି । ମୁଖ୍ୟମନ୍ତ୍ରୀ ଅଗ୍ନିକାଣ୍ଡର ତଦନ୍ତ ନିର୍ଦ୍ଦେଶ ଦେଇ ସମ୍ପୃକ୍ତ କ୍ଲବ୍ ମାଲିକଙ୍କ ବିରୋଧରେ ମାମଲା ରୁଜୁ କରିଥିବା ସୂଚନା ରହିଛି ।
ମୁଖ୍ୟମନ୍ତ୍ରୀ ଶ୍ରୀ ସାୱନ୍ତ କହିଛନ୍ତି ଯେ ନାଇଟ୍ କ୍ଲବ୍ ର ମାଲିକ ଏବଂ ପ୍ରବନ୍ଧକ(ମ୍ୟାନେଜର)ଙ୍କ ବିରୁଦ୍ଧରେ ଏତଲା ରୁଜୁ କରାଯାଇଛି ଏବଂ ସେମାନଙ୍କୁ ଖୁବଶୀଘ୍ର ଗିରଫ କରାଯିବ । ଆହତ ମାନଙ୍କ ସମ୍ପର୍କରେ ସୂଚନା ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ, ସମସ୍ତ ଛଅ ଜଣ ଆହତଙ୍କ ଅବସ୍ଥା ସ୍ଥିର ଅଛି । ସେମାନଙ୍କୁ ସର୍ବୋତ୍ତମ ଚିକିତ୍ସା ସେବା ଯୋଗାଇ ଦିଆଯାଉଛି । ଗୋଆରେ ଏପରି ଘଟଣା ପ୍ରଥମ ଥର ପାଇଁ ଘଟିଛି ବୋଲି ଶ୍ରୀ ସାୱନ୍ତ କହିଛନ୍ତି।
ସୂଚନା ଅନୁସାରେ ଗତକାଲି ମଧ୍ୟରାତ୍ରିରେ ବିର୍ଚ ବାଇ ରୋମିଓ ଲେନରେ ଅବସ୍ଥିତ ନାଇଟ୍ କ୍ଲବ୍ ରେ ଗ୍ୟାସ ଟାଙ୍କି ବିସ୍ଫୋରଣ ଯୋଗୁଁ ଅଗ୍ନିକାଣ୍ଡ ଘଟିଥିଲା । ନାଇଟ୍ କ୍ଲବ୍ ଟି ଗତ ବର୍ଷ ହିଁ ଆରମ୍ଭ ହୋଇଥିଲା । ପ୍ରାଥମିକ ତଦନ୍ତରୁ ଜଣାପଡିଛି ଯେ କ୍ଲବର ପ୍ରଥମ ମହଲାରେ ନିଆଁ ଲାଗିଥିଲା । ଭିଡ଼ ଏବଂ ଛୋଟ ଦ୍ୱାର ଯୋଗୁଁ ଗ୍ରାହକମାନେ ବାହାରକୁ ଯାଇପାରି ନଥିଲେ । ସେମାନଙ୍କ ମଧ୍ୟରୁ କିଛିଜଣ ତଳ ମହଲାକୁ ଦୌଡ଼ି ଯାଇଥିଲେ ଏବଂ କିଛି ସେଠାରେ ଫସି ଯାଇଥିଲେ ।
