ସମାଜଲାଇଭ ଡେସ୍କ: ଗହୀରମଥାରେ ବେଆଇନ ମାଛ ମାରୁଥିବା ୩୪ ମତ୍ସ୍ୟଜୀବୀଙ୍କୁ ଗିରଫ କରିଛି ବନ ବିଭାଗ। ଏହା ସହିତ ୨ଟି ଟ୍ରଲରକୁ ଜବତ କରାଯାଇଛି। ଅଲିଭରିଡ୍ଲେ କଇଁଚ୍ଛଙ୍କ ସୁରକ୍ଷା ପାଇଁ ରହିଥିବା ନିଷିଦ୍ଧାଞ୍ଚଳରେ ଏହି ମତ୍ସ୍ୟଜୀବୀମାନେ ମାଛ ଧରୁଥିଲେ। ଗିରଫ ହୋଇଥିବା ମତ୍ସ୍ୟଜୀବୀମାନେ ବାଲେଶ୍ଵର ଏବଂ ମୟୂରଭଞ୍ଜ ଜିଲାର। ସେମାନଙ୍କୁ କୋର୍ଟରେ ହାଜର କରାଯିବା ପରେ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି।
ଭିତରକନିକା ଏସିଏଫ ମାନସ ଦାସଙ୍କ ସୂଚନା ଅନୁସାରେ, ଟ୍ରଲରଗୁଡ଼ିକ ବନ୍ୟଜନ୍ତୁ ସୁରକ୍ଷା ଆଇନର ଉଲ୍ଲଂଘନ କରି ନିଷିଦ୍ଧାଞ୍ଚଳରେ ଅନୁପ୍ରବେଶ କରି ମାଛ ଧରୁଥିଲେ। ବର୍ତ୍ତମାନ ସୁଦ୍ଧା ୨୦୦ ମତ୍ସ୍ୟଜୀବୀଙ୍କୁ ଗିରଫ କରାଯାଇସାରିଛି। ଅଲିଭ ରିଡ୍ଲେଙ୍କ ଗଣ ଅଣ୍ଡାଦାନ ଋତୁ ଯୋଗୁ ସରକାରଙ୍କ ପକ୍ଷରୁ ଗତ ନଭେମ୍ବର ୧ରୁ ୭ ମାସ ପର୍ଯ୍ୟନ୍ତ ଧାମରାରୁ ଦେବୀ ନଦୀ ମୁହାଣ ପର୍ଯ୍ୟନ୍ତ ୨୦ କିଲୋମିଟର ଦୂର ଯାଏ ସାମୁଦ୍ରିକ ଅଞ୍ଚଳରେ ଟ୍ରଲରରେ ମାଛଧରା ଉପରେ କଟକଣା ଲାଗୁ ହୋଇଛି।
