ନୂଆଦିଲ୍ଲୀ: ରେଳ କର୍ମଚାରୀମାନେ ଆଜିଠାରୁ ୭୨ ଘଣ୍ଟିଆ ଅନଶନ ଧର୍ମଘଟ କରିଛନ୍ତି। ରେଳ କର୍ମଚାରୀଙ୍କ କ୍ଷେତ୍ରରେ ସପ୍ତମ ବେତନ କମିଶନ ସୁପାରିସ କାର୍ଯ୍ୟକାରୀ ଦାବି ଓ ରେଳବାଇର ପ୍ରସ୍ତାବିତ ଘରୋଇକରଣ ପ୍ରତିବାଦରେ ସର୍ବଭାରତୀୟ ରେଳ କର୍ମଚାରୀ ମହାସଂଘ ପକ୍ଷରୁ ଧର୍ମଘଟ ଡାକରା ଦିଆଯାଇଛି। ଦାବି ସମ୍ପର୍କରେ କେନ୍ଦ୍ର ରେଳମନ୍ତ୍ରୀ, ଅର୍ଥମନ୍ତ୍ରୀ, ସ୍ୱରାଷ୍ଟ୍ର ମନ୍ତ୍ରୀଙ୍କ ସହିତ ଏକାଧିକ ଥର ଆଲୋଚନା ହୋଇଥିଲେ ମଧ୍ୟ କୌଣସି ସୁଫଳ ମିଳିନାହିଁ ବୋଲି ମହାସଂଘ ଅଭିଯୋଗ କରିଛି। ଦାବି ମଧ୍ୟରେ ନିଶ୍ଚିତ ପେନ୍ସନ୍ ପ୍ରତିଶ୍ରୁତି ଓ ଫ୍ୟାମିଲି ପେନ୍ସନ୍ ପ୍ରଦାନ ଆଦି ରହିଛି। ଖୁବ୍ ଶୀଘ୍ର ଦାବି ପୂରଣ ନ ହେଲେ ଅନଶନ ବିକ୍ଷୋଭ କରାଯିବ ବୋଲି ଗତ ମାର୍ଚ୍ଚ ୧୩ ଓ ୧୪ତାରିଖରେ ଅନୁଷ୍ଠିତ ମହାସଂଘର ସାଧାରଣ ପରିଷଦ ଓ କାର୍ଯ୍ୟକାରୀ ପରିଷଦ ବୈଠକରେ ନିଷ୍ପତ୍ତି ହୋଇଥିଲା।
