ରାୟପୁର : ଛତିଶଗଡ଼ର ମାଓପ୍ରବଣ ସୁକମା ଜିଲାରେ ମଙ୍ଗଳବାର ସୁରକ୍ଷା କର୍ମୀଙ୍କ ସହ ଗୁଳି ବିନିମୟରେ ୪ ଜଣ ମାଓବାଦୀ ନିହତ ହୋଇଛନ୍ତି। ମାଓବାଦୀଙ୍କ ନିକଟରୁ ବିପୁଳ ପରିମାଣର ଗୋଳାବାରୁଦ ଓ ବନ୍ଧୁକ ଜବତ କରାଯାଇଛି। ଏନକାଉଣ୍ଟର ପରେ ସୁରକ୍ଷା ବାହିନୀ ସ୍ଥାନୀୟ ଅଞ୍ଚଳକୁ ଘେରାବନ୍ଦୀ କରି ତଲାସୀ ଅଭିଯାନ ଚଳାଇଛି। ରାଜ୍ୟର ବରିଷ୍ଠ ପୁଲିସ୍ ଅଧିକାରୀ କହିଛନ୍ତି ଯେ ସୁକମାର ଚିତଲନାର ଥାନା ଅଧରୀନ କରକନଗୁଡା ଗ୍ରାମ ନିକଟ ଜଙ୍ଗଲରେ ମଙ୍ଗଳବାର ସକାଳେ ପାଟ୍ରୋଲିଂ କରୁଥିବା କୋବ୍ରା ବାଟାଲିୟନ, ସିଆରପିଏଫ ବାହିନୀଙ୍କ ସହ ମାଓବାଦୀଙ୍କ ସଂଘର୍ଷ ଘଟିଥିଲା। ପ୍ରାୟ ଅଧ ଘଣ୍ଟାଏ ଗୁଳି ବିନିମୟ ପରେ ମାଓବାଦୀମାନେ ସେ ସ୍ଥାନ ଛାଡ଼ି ଫେରାର ହୋଇଯାଇଥିଲେ। ପରେ ଖାନତଲାସୀବେଳେ ସେଠାରୁ କଳା ପୋଷାକ ପିନ୍ଧିଥିବା ୪ ଜଣ ମାଓବାଦୀଙ୍କ ଶବ ମିଳିଥିଲା। ସେଠାରୁ ଏକ ଇନ୍ସାନ ରାଇଫଲ, ଦୁଇଟି ୩୦୩ ରାଇଫଲ ଏବଂ ଅନ୍ୟ ସାମଗ୍ରୀ ଜବତ କରାଯାଇଛି।
