ଜାତୀୟ ସ୍ତରୀୟ ରଗବୀ ଓ ଭଲିବଲ୍ ପ୍ରତିଯୋଗିତା ଉଦଯାପିତ: ଓଡ଼ିଶା ଉପ-ବିଜେତା, ଅଂଶଗ୍ରହଣ କଲେ ମୋଟ୍ ୩୧ ୟୁନିଟ୍

ଭୁବନେଶ୍ୱର : ବିଦ୍ୟାଳୟ ଓ ଗଣଶିକ୍ଷା ବିଭାଗ ତରଫରୁ ଭୁବନେଶ୍ବରରେ ୫ ଦିନ ଧରି ଚାଲିଥିବା ୬୭ତମ ଜାତୀୟ ସ୍ତରୀୟ ୧୪ବର୍ଷରୁ କମ୍ ବାଳକ- ବାଳିକା ବିଦ୍ୟାଳୟ ସମୂହ ରଗବୀ ଏବଂ ଭଲିବଲ୍ ପ୍ରତିଯୋଗିତା ଉଦଯାପିତ ହୋଇଯାଇଛି। ଏଥିରେ ରଗବୀ ବାଳକ ବର୍ଗରେ ବିହାର ବିଜେତା ହୋଇଥିବା ବେଳେ ଓଡିଶା ଉପ-ବିଜେତା ହୋଇଛି ।ସେହିପରି ବାଳିକା ବର୍ଗରେ ମଧ୍ୟ ବିହାର ଚମ୍ପିୟାନ ହୋଇଛି ଏବଂ ଓଡିଶା, ମହାରାଷ୍ଟ୍ର ଯଥାକ୍ରମେ ଦ୍ୱିତୀୟ ଏବଂ ତୃତୀୟ ସ୍ଥାନ ଅଧିକାର କରିଛନ୍ତି।

ଅନ୍ୟପଟେ ଭଲିବଲ୍ ପ୍ରତିଯୋଗିତାରେ ବାଳକ ବର୍ଗରେ ସିବିଏସଇ ୱେଲଫେୟାର ସୋସାଇଟ୍ ଚମ୍ପିୟାନ ହୋଇଥିବା ବେଳେ ଉତ୍ତରପ୍ରଦେଶ ରନର୍ସଅପ୍ ହୋଇଛି ଏବଂ ତାମିଲନାଡୁ ତୃତୀୟ ସ୍ଥାନ ଅଧିକାର କରିଛି। ବାଳିକା ବର୍ଗରେ ଉତ୍ତରପ୍ରଦେଶ ଚମ୍ପିୟାନ ହୋଇଥିବା ବେଳେ ହରିୟାଣା ରନର୍ସଅପ୍ ହୋଇଛି ଏବଂ ଆନ୍ଧ୍ର ପ୍ରଦେଶ ତୃତୀୟ ସ୍ଥାନ ଦଖଲ କରିଛି।

ସମସ୍ତ ରାଜ୍ୟରୁ ମୋଟ୍ ୩୧ଟି ୟୁନିଟ୍ ଏଥିରେ ଅଂଶ ଗ୍ରହଣ କରିଥିବା ବେଳେ ଉଦଯାପନୀ ଉତ୍ସବରେ ରାଜ୍ୟ ସରକାରଙ୍କ ବିଦ୍ୟାଳୟ ଏବଂ ଗଣଶିକ୍ଷା ବିଭାଗର ଶାସନ ସଚିବ ଶ୍ରୀମତୀ ଅଶ୍ୱଥି ଏସ୍. ସଭାପତିତ୍ବ କରିଥିଲେ । ମୁଖ୍ୟ ଅତିଥି ଭାବେ ପଦ୍ମଶ୍ରୀ ଦିଲ୍ଲୀପ ତିର୍କୀ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ କେ. ରବିକୁମାର, ଅଲିମ୍ପିଆନ ଅନୁରୋଧ ବିଶ୍ଵାଳ, ଏସଜିଏଫଆଇ ଅବଜର୍ଭର୍ ମୂର୍ତ୍ତି ରହୁ, ମାଧ୍ୟମିକ ଶିକ୍ଷା ନିର୍ଦ୍ଦେଶକ ସୁଶାନ୍ତ ଦାସ, କିଟ୍ କ୍ରୀଡା ନିର୍ଦ୍ଦେଶକ ଗଗନେନ୍ଧୁ ଦସ ପ୍ରମୁଖ ଯୋଗଦେଇ ପଦକ ଏବଂ ଟ୍ରଫି ପ୍ରଦାନ କରିଥିଲେ।