ଏସ୍‌ସିବିରେ ଯକୃତ ପ୍ରତିରୋପଣ

କଟକ : ଏସ୍‌ସିବି ମେଡିକାଲ କଲେଜ ଓ ହସ୍ପିଟାଲର ସଫଳତାରେ ଆଉ ଏକ ନୂଆ ଫର୍ଦ ଯୋଡିହେବାକୁ ଯାଉଛି। ଏଠାରେ ସଫଳତାର ସହିତ ବୃକ୍‌କ ଏବଂ ଅସ୍ଥିମଜ୍ଜା ପ୍ରତିରୋପଣ ହେବା ପରେ ଆଜି (ବୁଧବାର) ଲିଭର ଟ୍ରାନସପ୍ଲାଣ୍ଟ (ଯକୃତ ପ୍ରତିରୋପଣ) ଆରମ୍ଭ ହୋଇଛି। ଏଥିପାଇଁ ହାଇଦ୍ରାବାଦ ଏଆଇଜିର ଏକ ବିଶେଷଜ୍ଞ ଦଳ ଆସି ଏସ୍‌ସିବିରେ ପହଞ୍ଚିଛନ୍ତି। ଯକୃତ ଦାତା ଓ ଗ୍ରହୀତାଙ୍କୁ ଡାକ୍ତରୀ ଦଳ ନିରୀକ୍ଷଣ​‌ କରିଛନ୍ତି।
ସୂଚନା ଅନୁଯାୟୀ, ତିଗିରିଆ ଅଞ୍ଚଳର ଜଣେ ବ୍ୟକ୍ତିଙ୍କ ଶରୀରରେ ଏହି ପ୍ରତିରୋପଣ ହେବ। ତାଙ୍କ ପତ୍ନୀଙ୍କ ଶରୀରରୁ ଯକୃତର ତଳ ଅଂଶ କଢା ଯାଇ ସ୍ବାମୀଙ୍କ ଶରୀରରେ ପ୍ରତିରୋପଣ କରାଯିବ। ଏଥିପାଇଁ ଉଭୟଙ୍କୁ ମେଡିକାଲ ପକ୍ଷରୁ ସମସ୍ତ ପ୍ରକାର ପରୀକ୍ଷା ନିରୀକ୍ଷା ଶେଷ କରାଯାଇଛି। ହେପାଟୋଲୋଜି ଓ ଗ୍ୟାଷ୍ଟ୍ରୋସର୍ଜରୀ ବିଭାଗର ମିଳିତ ସହଯୋଗରେ ଏହି ପ୍ରତିରୋପଣ କରାଯାଉଛି। ଏଆଇଜି ଟିମ୍‌ ସହ ମେଡିକାଲର ଏକ ଡାକ୍ତରୀ ଦଳ ଅସ୍ତ୍ରୋପଚାରରେ ସାମିଲ ରହିଛନ୍ତି। ପ୍ରଥମ ଥର ପାଇଁ ୨୦୨୦ରେ ରାଜ୍ୟରେ ଯକୃତ ପ୍ରତିରୋପଣ କରାଯାଇଥିଲା। ଭୁବନେଶ୍ବରର ଏକ ଘରୋଇ ମେଡିକାଲରେ ଏହି ଅସ୍ତ୍ରୋପଚାର ହୋଇଥିଲା। ଉକ୍ତ ଅସ୍ତ୍ରୋପଚାର ମଧ୍ୟ ହାଇଦରାବାଦ ଏଆଇଜି ଟିମ୍ କରିଥିଲେ। ଯକୃତ ପ୍ରତିରୋପଣ ପାଇଁ ୨୦୧୪-୧୫ରେ ସ୍ବାସ୍ଥ୍ୟ ବିଭାଗ ପକ୍ଷରୁ ପଦକ୍ଷେପ ନିଆଯାଇଥିଲା।