ଦେବଗଡ଼ : ଦେବଗଡ଼ ବନଖଣ୍ଡ ରିଆମାଳ ଫରେଷ୍ଟ ରେଞ୍ଜ ତଥା କୁଣ୍ଢେଇଗୋଳା ବିଭାଗ ଅନ୍ତର୍ଗତ ନୂଆପଡ଼ା ଜଙ୍ଗଲରୁ ବନ ବିଭାଗ ପକ୍ଷରୁ ଏକ ମୃତ ବାରହା ଜବତ କରାଯାଇଛି। ଏହାସହ ୨ ଜଣ ଶିକାରୀଙ୍କୁ ଗିରଫ କରାଯାଇଛି। ଗିରଫ ଶିକାରୀ ମାନେ ହେଲେ ନୂଆପଡ଼ା ଗାଁର ବେଦବ୍ୟାସ ବେହେରା (୪୫) ଓ ସିଲୁ ବେହେରା (୨୭)। ବନ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ରବିବାର ସନ୍ଧ୍ୟାରେ କେତେକ ଶିକାରୀ ନୂଆପଡ଼ା ଜଙ୍ଗଲରୁ ଏକ ବାର୍ହା ଶିକାର କରି ମାଂସ ଭାଗବଣ୍ଟା କରିବା ପାଇଁ ଗାଁକୁ ବୋହି ନେଉଥିଲେ। ରିଆମାଳ ଫରେଷ୍ଟ ରେଞ୍ଜ ଅଫିସର ଭବାନୀ ଶଙ୍କର ଦାଶ ଓ କୁଣ୍ଢେଇଗୋଳା ଫରେଷ୍ଟର ପ୍ରିତମ କୁମାର ସାହୁ ଏନେଇ ଖବର ପାଇ ଘଟଣାସ୍ଥଳରେ ଚଢାଉ କରିଥିଲେ। ୨ ଜଣଙ୍କୁ ଗିରଫ କରାଯାଇଥିବା ବେଳେ ବନ ବିଭାଗ କର୍ମଚାରୀମାନଙ୍କୁ ଦେଖି ଏ ଘଟଣାରେ ସମ୍ପୃକ୍ତ ଅନ୍ୟମାନେ ସେଠାରୁ ଫେରାର ହୋଇଯାଇଥିଲେ। ଏହି ଘଟଣାରେ ବିଭିନ୍ନ ଦଫାରେ ଏକ ମାମଲା ରୁଜୁ କରାଯିବା ସହ ଘଟଣାରେ ସମ୍ପୃକ୍ତଥିବା ଅନ୍ୟମାନଙ୍କୁ ଗିରଫ କରିବାକୁ ଉଦ୍ୟମ ଚାଲିଛି। ବନ ବିଭାଗ ବାରହାର ମୃତଦେହକୁ ବ୍ୟବଚ୍ଛେଦ କରିବା ପରେ ମାଟିରେ ପୋତି ଦିଆଯାଇଥିବା ଜଣାପଡ଼ିଛି।
