ଫୁଲବାଣୀ: ଦିନ ଦ୍ୱିପହରରେ ପୁଣି ମାତିଲେ ବାଇକ୍ ଲୁଟେରା। ଆଜି ଜଣେ ବ୍ୟକ୍ତିଙ୍କ ଠାରୁ ୨ ଜଣ ବାଇକ୍ ଳୁଟେରା ୨୫ ହଜାର ଟଙ୍କା ଲୁଟ୍ କରିବା ଘଟଣା ସମଗ୍ର ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ଜଣେ ପେନସନଭୋଗୀ ସରକାରୀ କର୍ମଚାରୀ ବ୍ୟାଙ୍କରୁ ତାଙ୍କ ପେନସନ ଟଙ୍କା ଉଠାଇ ଫେରୁଥିବା ବେଳେ ଦୁଇଜଣ ଦୁର୍ବୃତ୍ତ ତାଙ୍କଠାରୁ ଟଙ୍କା ଲୁଟି ଫେରାର ହୋଇଯାଇଛନ୍ତି। ଅପରପକ୍ଷରେ ଏଭଳି ଘଟଣା ଫୁଲବାଣୀ ସହରରେ ଆଲୋଚ୍ୟ ବିଷୟ ହୋଇଛି। ତେବେ ଖବର ଲେଖାଯିବା ପର୍ଯ୍ୟନ୍ତ କେହି ଗିରଫ ହୋଇ ନଥିବା ଜଣାପଡିଛି।
ଟାଉନ ପୁଲିସ ସୂତ୍ରରୁ ମିଳିଥିବା ସୂଚନା ପ୍ରକାରେ, ଟିକାବାଲି ମାଷ୍ଟ୍ରପଡା ନିବାସୀ ଅବସରପ୍ରାପ୍ତ କର୍ମଚାରୀ କନିଷ୍ଠ ବେହେରା ଆଜି ସ୍ଥାନୀୟ ଆଲାହବାଦ ବ୍ୟାଙ୍କରୁ ତାଙ୍କ ପେନସନ ୨୫ ହଜାର ଟଙ୍କା ଉଠାଇ ଯାତ୍ରୀବାହି ବସରେ ଘରକୁ ଫେରିବା ପାଇଁ ଚାଲି ଚାଲି ଯାଉଥିଲେ। ଦିନ ପ୍ରାୟ ୧ଟା ସମୟରେ ଜିରିଙ୍ଗପଡା ନିକଟରେ ଦୁଇଜଣ ଅଜଣା ଯୁବକ ଏକ ବାଇକରେ ଦ୍ରୁତ ଗତିରେ ଆସି ତାଙ୍କୁ ପଛପଟୁ ଧକ୍କା ଦେଇଥିଲେ। କନିଷ୍ଠ ତଳେ ପଡିଯିବାରେ ଦୁର୍ବୃତ୍ତମାନେ ତାଙ୍କଠାରୁ ଟଙ୍କା ଥିବା ବ୍ୟାଗଟିକୁ ଛଡାଇ ନେଇଥିଲେ। ବ୍ୟାଗରେ କନିଷ୍ଠଙ୍କ ଆଧାର କାର୍ଡ, ପାସବୁକ, ପରିଚୟପତ୍ର ଓ ଅନ୍ୟାନ୍ୟ ଦରକାରୀ କାଗଜପତ୍ର ରହିଥିବା ପ୍ରକାଶ। ପୁଲିସ ଏହି ଘଟଣ।।ରେ କେସ ନଂ ୧୫୩ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି।
