ନୂଆଦିଲ୍ଲୀ: ସର୍ବୋଚ୍ଚ ନ୍ୟାୟାଳୟଙ୍କ ରାୟ ପରେ ବିଏସ୍ପି ନେତା ଅଫ୍ଜଲ ଆନ୍ସାରୀ ତାଙ୍କର ଲୋକସଭା ସଦସ୍ୟ ପଦ ଫେରିପାଇଛନ୍ତି। ଶୁକ୍ରବାର ଲୋକସଭା ସଚିବାଳୟ ପକ୍ଷରୁ ଏ ସଂକ୍ରାନ୍ତ ବିଜ୍ଞପ୍ତି ଜାରି କରାଯାଇଛି। ଏକ ଅପହରଣ ଓ ହତ୍ୟା ମାମଲାରେ ଏମପି/ଏମଏଲଏ ଅଦାଲତ ତାଙ୍କୁ ଦୋଷୀସାବ୍ୟସ୍ତ କରିବା ସହ ୪ ବର୍ଷ କାରାଦଣ୍ଡାଦେଶ ସମେତ ୧ ଲକ୍ଷ ଟଙ୍କା ଜୋରିମାନା ଲାଗୁ କରିଥିଲେ। ଫଳରେ ୨୦୨୩ ମେ’ ୧ରେ ଅଫଜଲଙ୍କ ସାଂସଦ ପଦ ରଦ୍ଦ କରାଯାଇଥିଲା। ଏହାର ପ୍ରତିବାଦରେ ସେ ପ୍ରଥମେ ଆହ୍ଲାବାଦ ଉଚ୍ଚ ନ୍ୟାୟାଳୟ ଏବଂ ପରେ ସର୍ବୋଚ୍ଚ ନ୍ୟାୟାଳୟଙ୍କ ଦ୍ବାରସ୍ଥ ହୋଇଥିଲେ।
ବିଚାରପତି ସୂର୍ଯ୍ୟକାନ୍ତ, ଦୀପଙ୍କର ଦତ୍ତ ଏବଂ ଉଜ୍ଜ୍ବଳ ଭୂୟାଁଙ୍କୁ ନେଇ ଗଠିତ ସର୍ବୋଚ୍ଚ ନ୍ୟାୟାଳୟ ପୀଠ ଗତ ଡିସେମ୍ବରରେ ମାମଲାର ଶୁଣାଣି କରି ସର୍ତ୍ତମୂଳକ ଭାବେ ଅଫ୍ଜଲଙ୍କ ସାଂସଦ ପଦ ଫେରାଇବାକୁ ନିର୍ଦେଶ ଦେଇଛନ୍ତି। ତଦନୁଯାୟୀ ଅଫଜଲ ଲୋକସଭା କାର୍ଯ୍ୟରେ ଅଂଶଗ୍ରହଣ କରିପାରିବେନି। ଗୃହରେ ଭୋଟ ଦେବାର କ୍ଷମତା ରହିବନି କିମ୍ବା ସେ କୌଣସି ପ୍ରକାର ଭତ୍ତା ପାଇବେନି ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି। ତେବେ ଅଫଜଲ ଆଗାମୀ ଲୋକସଭା ନିର୍ବାଚନ ଲଢିପାରିବେ ବୋଲି ସର୍ବୋଚ୍ଚ ନ୍ୟାୟାଳୟ ତାଙ୍କ ରାୟରେ ସ୍ପଷ୍ଟ କରିଛନ୍ତି। ଅଫଜଲ ଉତ୍ତର ପ୍ରଦେଶର ଗାଜିପୁର ଆସନରୁ ଲୋକସଭାକୁ ପ୍ରତିନିଧିତ୍ବ କରୁଛନ୍ତି।
Comments are closed.