ସମାଜ ଡିଜିଟାଲ ଡେସ୍କ: ଛତିଶଗଡ଼ର ଏକ ହୋଟେଲରେ ଭଙ୍ଗାରୁଜା କରିବା ଅଭିଯୋଗରେ ଅଟକ ଥିବା ପୂର୍ବତନ ମନ୍ତ୍ରୀ ସ୍ଵର୍ଗତ ନବ ଦାସଙ୍କ ପୁଅ ବିଶାଲ ଦାସ ଥାନାରୁ ବାହାରିଛନ୍ତି। ମାମଲା ରୁଜୁ କରିବା ପରେ ଛତିଶଗଡ଼ର ସରେଇପାଲି ଥାନା ପୁଲିସ ତାଙ୍କୁ ଏବଂ ତାଙ୍କ ସହଯୋଗୀମାନଙ୍କୁ ଛାଡ଼ି ଦେଇଛି।
ସୂଚନା ଅନୁସାରେ, ବିଶାଲ ଏବଂ ତାଙ୍କର ୧୩ ସହଯୋଗୀ ଛତିଶଗଡ଼ ଯାଇଥିଲେ। ସରେଇପାଲି ଥାନା ଅଞ୍ଚଳରେ ଥିବା ଏକ ହୋଟେଲରେ ସେମାନେ ଅନଧିକାର ପ୍ରବେଶ କରିବା ଏବଂ ହୋଟେଲରେ ଭଙ୍ଗାରୁଜା କରିଥିବା ନେଇ ଅଭିଯୋଗ ହୋଇଥିଲା। ହୋଟେଲ ପରିଚାଳକ ଏ ସମ୍ପର୍କରେ ସରେଇପାଲି ଥାନାରେ ଅଭିଯୋଗ କରିବା ପରେ ପୁଲିସ ଭାରତୀୟ ନ୍ୟାୟ ସଂହିତା (ବିଏନଏସ)ର ବିଭିନ୍ନ ଧାରା ଅନୁଯାୟୀ ପୁଲିସ ମାମଲା ରୁଜୁ କରିବା ସହିତ ବିଶାଲ ଏବଂ ତାଙ୍କ ସହଯୋଗୀମାନଙ୍କୁ ଅଟକ ରଖିଥିଲା। ଏପଟେ ଓଡ଼ିଶାରେ ଝାରସୁଗୁଡ଼ା ଜିଲା କିରମିରା ବ୍ଲକ ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଗତ ହୋଇଥିଲେ ହେଁ ତାହାର ଭୋଟ ଶୁକ୍ରବାର ବନ୍ଦ ରହିଥିଲା। ବିଶାଲ ଏବଂ ତାଙ୍କ ସହଯୋଗୀଙ୍କ ମଧ୍ୟରେ ସରପଞ୍ଚ ଓ ସମିତିସଭ୍ୟ ରହିଥିବାରୁ ସେମାନେ ଆସିପାରି ନ ଥିଲେ। ଫଳରେ ଅନାସ୍ଥା ଭୋଟ ବନ୍ଦ ରହିଥିଲା। ଏହି ପରିପ୍ରେକ୍ଷୀରେ ବିଜେଡି ସଭାପତି ନବୀନ ପଟ୍ଟନାୟକ ବିଶାଲଙ୍କୁ ଛାଡ଼ିବାକୁ ଛତିଶଗଡ଼ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଥିଲେ। ପରେ ସେଠାକାର ପୁଲିସ ବିଶାଲ ଓ ତାଙ୍କ ସହଯୋଗୀଙ୍କୁ ନୋଟିସ ଜାରି କରି ଛାଡ଼ିଥିବା ସୂଚନା ମିଳିଛି।
Comments are closed.