ଶୁକୃଳି : ଶିମିଳିପାଳ ଏବେ ପାଲଟିଛି ଅଫିମ ଚାଷର ଅଭୟାରଣ୍ୟ। ଶୁକ୍ରବାର ଶିମିଳିପାଳ ଅଭୟାରଣ୍ୟରେ ଚତୁର୍ଥ ଥର ପାଇଁ ବଡ଼ ଧରଣର ଚଢଉ ହୋଇଛି। ଅବକାରୀ ବିଭାଗ କର୍ମଚାରୀ ଏବଂ କରଞ୍ଜିଆ ଅତିରିକ୍ତ ତହସିଲଦାଙ୍କ ଉପସ୍ଥିତିରେ ଅଭୟାରଣ୍ୟର ଆଭ୍ୟନ୍ତର ଅଞ୍ଚଳରେ ଥିବା ସାରଦା ଗାଁରେ ପ୍ରାୟ ୮୫ ଜଣ ଅବକାରୀ କର୍ମଚାରୀକୁ ନେଇ ବଡ଼ ଧରଣର ଚଢାଉ କରାଯାଇଥିଲା। ୧୫ ଏକର ସ୍ଥାନରେ ଲକ୍ଷ୍ୟ ଲକ୍ଷ ଅଫିମ ଗଛ ଲାଗିଥିଲା । କେଉଁଠି ଫୁଲ ଫୁଟିଥିଲା ତ, ଆଉ କେଉଁଠି ଫଳ ଶୁଖି ଯାଇଥିଲା । ଅବକାରୀ ବିଭାଗ ସମସ୍ତ ଗଛକୁ ନଷ୍ଟ କରିବା ସହିତ ପୋଡି ଦେଇଛନ୍ତି । ଏହାର ଆନୁମାନିକ ମୁଲ୍ୟ ୧୦ କୋଟି ୫୦ ଲକ୍ଷ୍ ଟଙ୍କା ହେବ ବୋଲି ଅବକାରୀ ଇନ୍ସପେକ୍ଟର ଶ୍ରୀଧର ମହାନ୍ତି ସୂଚନା ଦେଇଛନ୍ତି। ଏତେ ସଂଖ୍ୟକ ଅଫିମ ଗଛ ନଷ୍ଟ କରିବାରେ ଏହା ଓଡ଼ିଶାରେ ପ୍ରଥମ ଘଟଣା ବୋଲି କୁହାଯାଉଛି। ଗୋଟିଏ ଅଫିମ ଗଛର ମୁଲ୍ୟ ୨୦୦ ଟଙ୍କା ହିସାବରେ ଧାର୍ଯ୍ୟ କରାଯାଇଛି । ସାରଦା ଗାଁରେ ଅବକାରୀ ବିଭାଗ ଚଢଉ କରିବାବେଳେ ଏହି ଗାଁଟି ଜନଶୂନ୍ୟ ହୋଇଯାଇଥିବା ଦେଖାଯାଇଥିଲା। ବର୍ଷ ବର୍ଷ ଧରି ଶିମିଳିପାଳ ଅଭୟାରଣ୍ୟ ଅଫିମ ଚାଷର ଏକ ପେଣ୍ଠସ୍ଥଳ ପାଲଟିଛି। ପ୍ରଥମ ଥର ଗତ ୨୪ ତାରିଖରେ ଶିମିଳିପାଳ ପାଦଦେଶରେ ଚଢଉ କରି ୨୬ ଲକ୍ଷ ଟଙ୍କାର ଅଫିମ ଗଛ ଜବତ କରାଯାଇଥିଲା। ଚଳିତ ମାସ ୧୦ ତାରିଖରେ ଦ୍ୱିତୀୟ ଥର ଶିମିଳିପାଳ ଅଭୟାରଣ୍ୟରେ ଚଢ଼ଉ କରାଯାଇ ୧୮ କୋଟିରୁ ଉର୍ଦ୍ଧ୍ବ ଟଙ୍କାର ଅଫିମ ଗଛ ନଷ୍ଟ କରାଯାଇଥିଲା। ତୃତୀୟ ଥର ପାଇଁ ଚଳିତ ମାସ ୧୬ ତାରିଖରେ ବଡ଼ ଧରଣର ଚଢଉ ହୋଇସାରିଥିଲା। ଶିମିଳିପାଳ ଅଭୟାରଣ୍ୟ ମଧ୍ୟରେ ଥିବା ଯୋଜଗଡା ଏବଂ ଫୁଲବାଡିରେ ଦେଢ଼ ଲକ୍ଷରୁ ଅଧିକ ଅଫିମ ଗଛ ଜବତ କରିବାରେ ଅବକାରୀ ଓ ପୁଲିସ ବିଭାଗ ସଫଳ ହୋଇଛି। ଏହାର ମୂଲ୍ୟ ୩ କୋଟି ୧୦ ଲକ୍ଷ୍ ଟଙ୍କା ହେବ ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି। ଏଥିେର ସଂପୃକ୍ତ ଥିବା ଅଫିମ ଚାଷୀ କିମ୍ବା ମାଫିଆଙ୍କୁ ଧରିବାରେ ବିଭାଗ ସଫଳ ହୋଇପାରିନି।
Comments are closed.