ରେଙ୍ଗାଲି: ସମ୍ବଲପୁର ଜିଲାର ଲଇଡାରେ ଥିବା ମା’ ସମଲେଶ୍ୱରୀଙ୍କ ଅନ୍ୟତମ ପ୍ରାଚୀନ ଶକ୍ତିପୀଠରେ ପ୍ରସିଦ୍ଧ ବଏଲ୍ ଯାତ୍ରା ଆସନ୍ତା ୨୭ (ଶୁକ୍ରବାର)ଅନୁଷ୍ଠିତ ହେବ। ଇତି ମଧ୍ୟରେ ମା’ ସମଲେଶ୍ୱରୀଙ୍କ ପୀଠରେ ଆଶ୍ୱିନ କୃଷ୍ମ ପ୍ରତିପଦା ଦିନ ୯ଦିନ ପର୍ଯ୍ୟନ୍ତ ଅଖଣ୍ଡ ଦୀପ ପ୍ରଜ୍ଜଳନ, ସପ୍ତମୀରେ ପୁଅ ଜିଉଁନ୍ତିଆ ବ୍ରତ ଏବଂ ପାଟଖଣ୍ଡା ସ୍ଥାପନ, ଅଷ୍ଟମୀରେ ଖଣ୍ଡା ଧୂଆ ଏବଂ ମା’ ସମଲେଇଙ୍କ ଷୋହଳ ଖଣ୍ଡା ସ୍ଥାପନ, ମହାଳୟା ଅମାବାସ୍ୟା ତିଥିରେ ଉଆଁସ ବଏଲ୍ ଯାତ୍ରା ଉପଲକ୍ଷେ ସମଲେଇଙ୍କ ପ୍ରଥମ ଆବର୍ଭାବ ସ୍ଥଳ ଗୁଚ୍ଛାପାଲି ସମଲେଇ ଦରହରୁ ଦେବୀ ବାହାନ ବରୁଆ ବାହାରି ଗ୍ରାମ୍ୟ ପରିକ୍ରମା ବିଧି ସମ୍ପନ୍ନ ହୋଇ ସାରିଥିବା ବେଳେ ୨୪ ତାରିଖ ବିଜୟା ଦଶମୀ ଦିନ ଅଖଣ୍ଡ ଦୀପ ବିସର୍ଜନ କରାଯାଇଥିଲା।
ଦଶହରା ପୂଜା ଅବସରରେ ସନ୍ଧ୍ୟାରେ ଲଇଡା ଜମିଦାର ପୃଥ୍ୱିରାକ ସିଂହ ତାଙ୍କ ଅନୁଗତ ଏବଂ ମନ୍ଦିର ପରିଚାଳନା କମିଟିର କର୍ମକର୍ତ୍ତା ତଥା ବଳିଯାତ୍ରା ପୂଜା କମିଟିର କର୍ମକର୍ତ୍ତାମାନଙ୍କ ଗହଣରେ ରଣଜିତାରେ ବାହାରି ଦୁଳଦୁଳି ବାଜା ସହିତ ତାଳ ଦେଇ ବିିଭିନ୍ନ ପ୍ରକାର ରଣ କୌଶଳର ଚିତ୍ତାକର୍ଷକ ଆଖଡା ପ୍ରଦର୍ଶନ କରିଥିଲେ। ଲଇଡାର ସମଲେଶ୍ୱରୀ ପୀଠ ଭଳି ରେଙ୍ଗାଲି ବ୍ଳକର ଝାଙ୍କରପାଲି-ଲାଉମାଲ ସମଲେଇ ମନ୍ଦିରରେ ମଧ୍ୟ ବିଜୟା ଦଶମୀ ଦଶହରା ଦିନ ରଣଜିତା ଅନୁଷ୍ଠିତ ହୋଇଥିବା ଜଣାପଡିଛି।
Comments are closed.