କେନ୍ଦୁଝର: ଭାରତ ସରକାରଙ୍କ ସୂଚନା ଏବଂ ପ୍ରସାରଣ ମନ୍ତ୍ରଣାଳୟ ଅଧିନସ୍ଥ କ୍ଷେତ୍ର ଜନସଂପର୍କ କାର୍ଯ୍ୟାଳୟ କେନ୍ଦୁଝର ତରଫରୁ ‘ମୋ ଭୋଟ୍, ମୋ ଅଧିକାର’ ସଂପର୍କିତ ଏକ ଆଭାସୀ କର୍ମଶାଳା ଅନୁଷ୍ଠିତ ହୋଇଯାଇଛି। ଏହି କର୍ମଶାଳାରେ ଭାରତ ସରକାରଙ୍କ ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ଭାରତୀୟ ସୂଚନା ସେବାର ବରିଷ୍ଠ ଅଧିକାରୀ ତଥା ଆଂଚଳିକ ଜନସମ୍ପର୍କ କାର୍ଯ୍ୟାଳୟ, ଭୁବନେଶ୍ୱରର ଅତିରିକ୍ତ ମହାନିର୍ଦ୍ଦେଶକ ଅଖିଳ କୁମାର ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ସୋର ମହିଳା ଡିଗ୍ରୀ ମହାବିଦ୍ୟାଳୟର ଅଧ୍ୟକ୍ଷ ବୃନ୍ଦାବନ ରାଉଳ ଯୋଗ ଦେଇଥିଲେ। ଅନ୍ୟ ଅତିଥି ଭାବେ ସନ୍ତୋଷୀମା ଡିଗ୍ରୀ କଲେଜର ଅଧ୍ୟାପକ ଅମୀୟ କୁମାର ସାମନ୍ତରା ଯୋଗ ଦେଇଥିଲେ। ଶ୍ରୀ ରାଉଳ ମୁଖ୍ୟ ବକ୍ତାଭାବେ ଯୁବ ଭୋଟରମାନଙ୍କୁ ଗଣତନ୍ତ୍ରର ମହୋତ୍ସବରେ ବହୁ ସଂଖ୍ୟାରେ ଯୋଗ ଦେବାପାଇଁ ଆହ୍ୱାନ କରିଥିଲେ ଏବଂ ନକଲି ଭୋଟର ଭୟାବହତା ସମ୍ପର୍କରେ ଅବଗତ କରିଥିଲେ।
କାର୍ଯ୍ୟକ୍ରମର ସଭାପତି ଅଖିଳ କୁମାର ମିଶ୍ର ଭୋଟଦାନ ଏକ ମହତ ଦାନ ତଥା ପ୍ରତ୍ୟେକ ବ୍ୟକ୍ତି ନିଜର ଭୋଟ ଦେବାର ଅଧିକାରକୁ ସାବ୍ୟସ୍ତ କରିବା ପାଇଁ ଆହ୍ୱାନ ଦେଇଥିଲେ। ଅନ୍ୟ ବକ୍ତାଭାବେ ଶ୍ରୀ ସାମନ୍ତରା ନୂତନ ଭୋଟରମାନଙ୍କୁ ବିଭିନ୍ନ ପ୍ରଲୋଭନର ବଶବର୍ତୀ ନ ହୋଇ ନିଜର ବୁଦ୍ଧି ଏବଂ ବିବେକ ଦ୍ୱାରା ଭୋଟଦାନ କରିବା ପାଇଁ ଆହ୍ୱାନ ଦେଇଥିଲେ। ଏହି କାର୍ଯ୍ୟକ୍ରମକୁ କେନ୍ଦୁଝର କ୍ଷେତ୍ର ଜନସମ୍ପର୍କ ଅଧିକାରୀ ପାର୍ଥସାରଥୀ ମଲ୍ଲିକ ପରିଚାଳନା କରିଥିବା ବେଳେ ଜୀବନ କୁମାର ସାମନ୍ତସିଂହାର ଧନ୍ୟବାଦ ଅର୍ପଣ କରିଥିଲେ।
Comments are closed.