କଟକ: ଆକାଶବାଣୀ କଟକ କେନ୍ଦ୍ରର ବରିଷ୍ଠ ଉପସ୍ଥାପକ ଭାବଗ୍ରାହୀ ମହାପାତ୍ର (୫୫)ଙ୍କ ପରଲୋକ ହୋଇଯାଇଛି। ସେ ୨୦୧୬ ମସିହାରୁ କର୍କଟ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ। ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ କଙ୍କାଳୁ ଗ୍ରାମର ହୃଦାନନ୍ଦ ମହାପାତ୍ରଙ୍କ ପୁଅ ଭାବଗ୍ରାହୀ (ଡାକ ନାମ ମଙ୍ଗଳୁ) କଟକରେ ରହୁଥିଲେ। ସେ ୧୯୮୮ ମସିହାରୁ ଆକାଶବାଣୀ କଟକ କେନ୍ଦ୍ରରେ ଜଣେ ସାମୟିକ ଉପସ୍ଥାପକ ଭାବେ କାର୍ଯ୍ୟ କରି ଆସୁଥିଲେ। ସେ କିଛିଦିନ ଦୈନିକ ପ୍ରଜାତଂତ୍ରରେ ସାମ୍ବାଦିକ ଭାବେ କାର୍ଯ୍ୟ କରିଥିଲେ।
ସେ ପ୍ରଥମେ କୃଷିବିଭାଗରେ ଉପସ୍ଥାପକ ଭାବେ କାର୍ଯ୍ୟ କରୁଥିଲେ। ପରେ ଅନ୍ୟ ବିଭାଗ ଓ ବହୁ ଲୋକପ୍ରିୟ କାର୍ଯ୍ୟକ୍ରମରେ ଉପସ୍ଥାପକ ଭାବେ କାମ କରି ଶ୍ରୋତାଙ୍କ ନିକଟରେ ଜଣେ ଲୋକପ୍ରିୟ ଉପସ୍ଥାପକ ଭାବେ ପରିଚିତ ହୋଇ ପାରିଥିଲେ। ଭାବଗ୍ରାହୀ ଜଣେ ଗୀତିକାର, କଣ୍ଠଶିଳ୍ପୀ, ଲେଖକ ଓ ସାହିତ୍ୟିକ ଭାବେ ପରିଚିତ ଥିଲେ। ସେ କଳା ଓ ସାହିତ୍ୟ ସହିତ ଜଡିତ ବହୁ ବ୍ୟକ୍ତିଙ୍କ ଜୀବନୀକୁ ନେଇ ଏକ ପୁସ୍ତକ ରଚନା କରିବା ସହ ବହୁ ଅନୁଷ୍ଠାନ ସହିତ ଜଡିତ ଥିଲେ। ତାଙ୍କ ମୃତ୍ୟୁରେ ତାଙ୍କ ବୃଦ୍ଧ ପିତା, ପତ୍ନୀ, ପୁଅ ଓ ଝିଅ ବେସାହାରା ହୋଇ ପଡିଛନ୍ତି। ତାଙ୍କ ପରଲୋକରେ ଆକାଶବାଣୀ ଅଧିକାରୀ, କର୍ମକର୍ତ୍ତା, ଉପସ୍ଥାପକ ଉପସ୍ଥାପିକା ଓ ଗୋଲଡେନ୍ ଭଏସ୍ ଅଫ୍ ଓଡିଶାର ସଦସ୍ୟମାନେ ଗଭୀର ଶୋକବ୍ୟକ୍ତ କରିଛନ୍ତି।
