ସମ୍ବଲପୁର: ସମ୍ବଲପୁରର ଅଇଁଠାପାଲି ଥାନା ଅର୍ନ୍ତଗତ ‘ମୌର୍ଯ୍ୟ ରେସିଡେନ୍ସି’ ଆପାର୍ଟମେଣ୍ଟ ଅଞ୍ଚଳରେ ସମ୍ବଲପୁର ଜିଲା ପ୍ରଶାସନ ତରଫରୁ ୧୪୪ ଧାରା ଲାଗୁ କରାଯାଇଛି। ଉପ ଜିଲାପାଳ ଅନିରୁଦ୍ଧ ପ୍ରଧାନଙ୍କ ଦ୍ୱାରା ଜାରି ନିର୍ଦ୍ଦେଶ ଅନୁଯାୟୀ, ବୁଧବାରରୁ ଶୁକ୍ରବାର ପର୍ଯ୍ୟନ୍ତ ସମ୍ବଲପୁରବାସୀଙ୍କୁ କରୋନା ସଂକ୍ରମଣରୁ ରକ୍ଷା କରିବା ପାଇଁ କାଇଁଶିର ମୌଜା ଅର୍ନ୍ତଗତ ‘ମୌର୍ଯ୍ୟ ରେସିଡେନ୍ସି’ ଅଞ୍ଚଳରେ ୧୪୪ ଧାରା ଲଗାଯାଇଛି।
ଏହି ସମୟରେ ମଧ୍ୟରେ କେବଳ ଚିକିତ୍ସା, ଅତ୍ୟାବଶ୍ୟକୀୟ ସାମଗ୍ରୀ ଓ ସେବା ବ୍ୟତିତ ବାକି ସବୁ ବ୍ୟବସ୍ଥା ଅଞ୍ଚଳରେ ବନ୍ଦ ରହିବ। ପ୍ରତିବନ୍ଧିତ ଅଞ୍ଚଳକୁ କେହି ଯାଇ ପାରିବେ ନାହିଁ। ୧୪୪ ଧାରା ଲାଗୁ ସମୟରେ ମାଜିଷ୍ଟ୍ରେଟ ଓ ଥାନାଧିକାରୀଙ୍କୁ ଅଞ୍ଚଳ ଉପରେ ତୀକ୍ଷଣ ନଜର ରଖିବେ ଏବଂ ଉଲ୍ଲଂଘନକାରୀ ମାନଙ୍କ ବିରୋଧରେ ଆଇନ ଅନୁଯାୟୀ କଡା କାର୍ୟ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି। କରୋନା ସଂକ୍ରମଣ ଆରମ୍ଭ ହେବା ପରେ ପ୍ରଥମ ଥର ପାଇଁ ସମ୍ବଲପୁର ମୁଖ୍ୟ ସହରର କୌଣସି ଅଞ୍ଚଳରେ ସଂକ୍ରମଣକୁ ପ୍ରତିହିତ କରିବା ପାଇଁ ଏଭଳି ପଦକ୍ଷେପ ପ୍ରଶାସନ ଗ୍ରହଣ କରିଛି।
