ଗଞ୍ଜାମ: ଗଞ୍ଜାମ ବ୍ଲକ ସଭାଗୃହଠାରେ ସୋମବାର ଗୋଷ୍ଠୀ ଶିକ୍ଷା ଅଧିକାରୀ କାର୍ଯ୍ୟାଳୟ ତରଫରୁ ସହ ପାଠ୍ୟକ୍ରମ ଗତିବିଧି କର୍ମଶାଳା ଅନୁଷ୍ଠିତ ହୋଇଯାଇଛି। ବ୍ଲକ୍ ଶିକ୍ଷା ଅଧିକାରୀ ଭାଗିରଥୀ ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସଭାରେ ସହ ଗୋଷ୍ଠୀ ଶିକ୍ଷା ଅଧିକାରୀ ରୋହିତ କୁମାର ଦାସ, ଅଭିରାମ ନାୟକ ଓ ରମେଶ ଚନ୍ଦ୍ର ବେହେରା ସିଆରସିସି, ପ୍ରକାଶ ଚନ୍ଦ୍ର ବେହେରା, ସଂଯୁକ୍ତା ଦାସ, ସୁଦାମ ନାହାକ, ଦୁର୍ଗା ପଟ୍ଟନାୟକ ପ୍ରଧାନ ଶିକ୍ଷକ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ମୁଖ୍ୟତଃ ଭାବେ ଏହି କର୍ମଶାଳାରେ ପିଲାଙ୍କ ସର୍ବାଙ୍ଗୀନ ଉନ୍ନତିରେ ସହ ପାଠ୍ୟକ୍ରମ ନାଚ, ଗୀତ, ଖେଳ, ଚିତ୍ର, ଲେଖନୀ, ବକ୍ତୃତା ଆଦିର ପ୍ରତିଯୋଗିତା ଓ କାର୍ଯ୍ୟକ୍ରମ ବର୍ଷ ସାରା ନିହାତି ଆବଶ୍ୟକ ବୋଲି ମତ ପ୍ରକାଶ ପାଇବା ସହ ଆସନ୍ତା ପାଠ୍ୟ ବର୍ଷ ୨୦୨-୨୩ ନିମନ୍ତେ ସହ ପାଠ୍ୟକ୍ରମ ଗତିବିଧି କାର୍ଯ୍ୟସୂଚୀ କେମିତି ତିଆରି କରିହେବ ତାହାରି ଉପରେ ତାଲିମ ଦିଆଯାଇଥିଲା ।
ସୋମବାରଠାରୁ ଶୁକ୍ରବାର ଯାଏଁ ପାଠପଢା ଏବଂ ଶନିବାର ଦିନ କେବଳ ବିଭିନ୍ନ ସହ କାର୍ଯ୍ୟକ୍ରମ ହେବାର ନିର୍ଦ୍ଧାରିତ ହେଲା। ବିଭିନ୍ନ ଦିବସର ଗୁରୁତ୍ଵ ଓ ଇତିହାସକୁ ଧ୍ୟାନ ରଖି, ଆଞ୍ଚଳିକ କଳା, ସଂସ୍କୃତି ଅନୁସାରେ ବିଭିନ୍ନ କାର୍ଯ୍ୟକ୍ରମ କେମିତି କରିହେବ ତାହାର ଉପାୟମାନ ସ୍ଥିର କରାଗଲା । ଏହା ସହ ପିଲାଙ୍କ ଅନେକ ଦକ୍ଷତା ବୃଦ୍ଧି ନିମନ୍ତେ ପ୍ରତ୍ୟେକ ବିଦ୍ୟାଳୟର ହବି କ୍ଲବ ସବୁ ଗଠିତ ହେବ ବୋଲି ସହମତି ହେଲା । ପ୍ରାୟ ୧୨ ଜଣ ସିଆରସିସି ଓ ୪୦ ଜଣ ଉଚ୍ଚପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ଓ ଶିକ୍ଷୟିତ୍ରୀ ଭାଗ ନେଇଥିଲେ। ଶେଷରେ ସୁଦାମ ନାହାକ ଧନ୍ୟବାଦ ଅର୍ପଣ କରିଥିଲେ ।
