ସମ୍ବଲପୁର : କରୋନାର କରାଳ ପ୍ରକୋପ ଜାରି ରହିଥିବା ବେଳେ ଗତ ବର୍ଷ ଜୁନ ମାସରେ ସାରା ରାଜ୍ୟରେ ନକଲି କରୋନା ଓ ଜୀବନ ରକ୍ଷାକାରୀ ଔଷଧ ଧରା ପଡିବା ପରେ ଏକ ବର୍ଷର ବ୍ୟବଧାନ ପରେ ପୁର୍ନବାର ନକଲି ଔଷଧ କଳାବଜାରୀ ମାନେ ବଜାରରେ ସକ୍ରିୟ ହୋଇଥିବାର ଖବର ସମ୍ମୁଖକୁ ଆସିଛି । ଏହି କ୍ରମରେ ରାଜ୍ୟ ସରକାରଙ୍କ ଡ୍ରଗ ନିୟନ୍ତ୍ରକଙ୍କ ଦ୍ୱାରା ଜାରି ନିର୍ଦ୍ଦେଶାନୁଯାୟୀ, ଏବେ ସାରା ରାଜ୍ୟରେ ନକଲି ଔଷଧ ଉପରେ ବ୍ୟାପକ ଚଢ଼ଉ ଅଭିଯାନ ଆରମ୍ଭ କରାଯାଇଛି । ଡ୍ରଗ ବିଭାଗକୁ ମିଳିଥିବା ସୂଚନାନୁଯାୟୀ, ଉଚ୍ଚ ରକ୍ତଚାପ ଓ ହୃଦୟ ରୋଗର ନିୟନ୍ତ୍ରଣ ପାଇଁ ଖ୍ୟାତନାମା କମ୍ପାନୀ ଗ୍ଲେନମାର୍କ କମ୍ପାନୀର ଔଷଧ (ଟେଲମା – ୪୦) ର ନକଲି ଔଷଧ ବଜାରକୁ ଆସିଛି । ଏଣୁ ତୁରନ୍ତ ବିଭାଗ ପକ୍ଷରୁ ସକ୍ରିୟ ହୋଇ ସାରା ରାଜ୍ୟର ବିଭିନ୍ନ ଜିଲାରେ ଚଢ଼ଉ କରାଯାଉଥିବା କ୍ରମରେ ସମ୍ବଲପୁର ଠାରେ ମଧ୍ୟ ଗୁରୁବାର ଅପରାହ୍ନରେ ବିଭାଗ ପକ୍ଷରୁ ଚଢ଼ଉ କରାଯାଇଛି ।
ଏହି କମ୍ପାନୀର ଔଷଧ ବିକ୍ରି କରୁଥିବା ହୋଲସେଲ ଦୁର୍ଗା ମେଡିକାଲ ଏଜେନ୍ସି ରେ ଚଢ଼ଉ ସମୟରେ ବିଭାଗ ପକ୍ଷରୁ ସନ୍ଦେହ କରାଯାଉଥିବା ବ୍ୟାଚ ନମ୍ବରର ୮୦ଟି ଷ୍ଟିପ (୮୦୦ଟି ବଟିକା) ବିଗତ କିଛି ଦିନ ମଧ୍ୟରେ ଅର୍ଡର କରି ଅଣା ଯାଇଛି । ଉକ୍ତ ଔଷଧ ଗୁଡିକୁ ହୋଲସେଲ ଏଜେନ୍ସି ରିଟେଲ ବଜାରରେ ବିକ୍ରି ନିମନ୍ତେ ସମ୍ବଲପୁର ବୁଢ଼ାରଜା ସ୍ଥିତ ପ୍ଲାନେଟ ମେଡିକାଲ ହଲ ଏବଂ କୁଚିଣ୍ଡାର ନ୍ୟୁଭାରତ ମେଡିକାଲ ଷ୍ଟୋରକୁ ବିକ୍ରି ପାଇଁ ଦିଆଯାଇଥିବାର ଯାଞ୍ଚ ସମୟରେ ଜଣାପଡିଛି । ବିକ୍ରି ପାଇଁ ଦିଆଯାଇଥିବା ୮୦ଟି ଷ୍ଟ୍ରିପ ମଧ୍ୟରୁ ୩୮ଟି ଷ୍ଟ୍ରିପ ବିକ୍ରି ହୋଇ ଯାଇଥିବା ବେଳେ ୪୨ଟି ଷ୍ଟ୍ରିପ ଔଷଧ ବିକ୍ରି ପାଇଁ ରହିଛି । ଏଣୁ ତୁରନ୍ତ ବିଭାଗୀୟ ନିର୍ଦ୍ଦେଶାନୁଯାୟୀ ବିକ୍ରି ପାଇଁ ରହିଥିବା ୪୨ଟି ଷ୍ଟ୍ରିପ ଔଷଧ ଗୁଡିକୁ ଫେରାଇ ଆଣିବା ପାଇଁ ହୋଲସେଲ ଏଜେନ୍ସିକୁ ନିର୍ଦ୍ଦେଶ ଦିଆଯାଇଛି । ଇତି ମଧ୍ୟରେ ୧୦ଟି ଷ୍ଟ୍ରିପ ଔଷଧ ବିଭାଗ ନିକଟକୁ ପହୁଞ୍ôଚ ସାରିଥିବା ବେଳେ ବିଭାଗୀୟ ଯାଞ୍ଚ ସମୟରେ ଉକ୍ତ ବ୍ୟାଚରେ ଆସିଥିବା ଔଷଧ ଗୁଡିକର ପ୍ୟାକିଂ ବାକ୍ସରେ ଥିବା କ୍ୱୁ୍ୟ – ଆର କୋଡକୁ ସ୍କାନ କଲେ ଉକ୍ତ କମ୍ପାନୀର ନାମ ବାହାରୁଛି । କିନ୍ତୁ ବାକ୍ସ ମଧ୍ୟରେ ରହିଥିବା ଔଷଧ ଷ୍ଟ୍ରିପ ଗୁଡିକୁ ସ୍କାନ କରିଲେ କୌଣସି ଏକ କପଡା ଦୋକାନର ନାମ ବାହାରୁଛି । ଏଣୁ ଉକ୍ତ ଔଷଧ ଗୁଡିକ ନକଲି ହୋଇଥିବାର ସନ୍ଦେହ କରି ସମସ୍ତ ଔଷଧ ଗୁଡିକୁ ହେପାଜତରେ ନିଆଯାଇ ଯାଞ୍ଚ ପାଇଁ ପଠାଯାଇଛି ବୋଲି ବିଭାଗୀୟ ସୂତ୍ରରୁ ପ୍ରକାଶ ।
ଏ ସର୍ମ୍ପକରେ ସମ୍ବଲପୁର ଜିଲା ଡ୍ରଗିଷ୍ଟ ଆଣ୍ଡ କେମିଷ୍ଟ ଏସୋସିଏସନର ସଭାପତି ପ୍ରଶାନ୍ତ ରଥ ଙ୍କ ଅନୁଯାୟୀ, ଏକ ଖ୍ୟାତନାମା କମ୍ପାନୀର ନକଲି ଔଷଧ ବଜାରକୁ ଆସିଥିବାର ଖବର ଆମକୁ ମିଳିଛି । ଏଣୁ ତୁରନ୍ତ ଜିଲାରେ ଥିବା ସମସ୍ତ ଔଷଧ ଦୋକାନୀ ମାନଙ୍କୁ ଉକ୍ତ କମ୍ପାନୀର ସେହି ଔଷଧକୁ ତୁରନ୍ତ ବିକ୍ରି ନିଷେଧ ସହିତ ସେଗୁଡିକୁ ଯାଞ୍ଚ ନ ସରିବା ପର୍ଯ୍ୟନ୍ତ ଅଲଗା ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ଏଥି ସହ ଜନତା ଙ୍କ ସ୍ୱାସ୍ଥ୍ୟ ସୁରକ୍ଷା ଦୃଷ୍ଟିରୁ ଡ୍ରଗ ବିଭାଗକୁ ସମସ୍ତ ପ୍ରକାରର ସହାୟତା ଏସୋସିଏସନ କରିବ ବୋଲି ସଭାପତି ଶ୍ରୀ ରଥ କହିଛନ୍ତି ।
ସୁଚନାଯୋଗ୍ୟ ଯେ, ବିଗତ ବର୍ଷ ଜୁନ ମାସରେ ସାରା ରାଜ୍ୟ ସମେତ ସମ୍ବଲପୁର ଠାରେ ମଧ୍ୟ କ୍ରମାଗତ ନକଲି ଔଷଧ ଜବତ ହେବା ପରେ ଭୟରେ ଅସାଧୁ ବ୍ୟବସାୟୀ ମାନେ ନକଲି ଔଷଧ ଏଣେ ତେଣେ ଫିଙ୍ଗି ଦେଇଥିବାର ମଧ୍ୟ ଦେଖାଯାଇଥିଲା । ପରବର୍ତ୍ତୀ ସମୟରେ ନକଲି ଔଷଧ ନିର୍ମାଣକାରୀ ସଂସ୍ଥା ବିରୋଧରେ ଡ୍ରଗ ବିଭାଗ କଡା କାର୍ଯ୍ୟାନୁଷ୍ଠାନ ନିଆଯାଇଥିଲା ।
Comments are closed.