ଗୋପାଳପୁର: ସରକାର ଗମନାଗମନର ସୁବିଧା ଲାଗି ବିଭିନ୍ନ ଯୋଜନାମାନ ପ୍ରଣୟନ କରିଛନ୍ତି । ଏଥିଲାଗି କୋଟି କୋଟି ଟଙ୍କା ମଧ୍ୟ ଖର୍ଚ୍ଚ କରାଯାଉଛି । ହେଲେ ଅନେକ ସ୍ଥାନରେ ଏହାର ବାଟମାରଣା କରାଯାଉଛି। ଯାହାର ଜ୍ବଳନ୍ତ ଉଦାହରଣ ଦେଖିବାକୁ ମିଳିଛି ଗୋପାଳପୁରରେ । ସୂଚନା ମୂତାବକ ଓଡିଶା ଗ୍ରାମ୍ୟ ନିର୍ମାଣ ବିଭାଗ ପକ୍ଷରୁ ଆଲ୍ଲିପୁର ଛକଠାରୁ ଗୋପାଳପୁର -ମନସୁରକୋଟା ପର୍ଯ୍ୟନ୍ତ ଦୀର୍ଘ ୫ କିମିର ରାସ୍ତା ନିର୍ମାଣ କରାଯାଇଥିଲା।
ନିର୍ମାଣ ହେବାର ୫ବର୍ଷ ମଧ୍ୟରେ ରାସ୍ତାର ରକ୍ଷଣାବେକ୍ଷଣା ଲାଗି ନିର୍ଦ୍ଧେଶ ରହିଥିଲା। ହେଲେ ବିଭାଗୀୟ ଅଧିକାରୀ ଓ ଠିକାଦାରଙ୍କ ମଧ୍ୟରେ ମଧୁଚନ୍ଦ୍ରିକା ଯୋଗୁଁ ଲକ୍ଷାଧିକ ଟଙ୍କା ଚଳୁ କରାଯାଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ଏମିତିକି ରାସ୍ତା ନିର୍ମାଣ ହେବାର ଦୁଇ ବର୍ଷ ନପୁରୁଣୁ ରାସ୍ତାର ଅନେକ ସ୍ଥାନରେ ଖାଲଖମା ସୃଷ୍ଟି ହୋଇଥିଲା। ଏ ନେଇ ବାରମ୍ବାର ଗ୍ରାମବାସୀମାନେ ଉପରିସ୍ଥ ଅଧିକାରୀଙ୍କୁ ଅଭିଯୋଗ କରିଛନ୍ତି । ହେଲେ କିଛି ସୁଫଳ ମିଳିନାହିଁ। ତେଣୁ ବିଭାଗୀୟ ଅଧିକାରୀମାନେ କଣ ପାଇଁ ରାସ୍ତାର ରକ୍ଷଣାବେକ୍ଷଣ କରୁନାହାନ୍ତି , ତାହା ବଡ ପ୍ରଶ୍ନବାଚୀ ସୃଷ୍ଟି କରିଛି।
