ଗଞ୍ଜାମ: ରମ୍ଭା ବିଜ୍ଞାପିତ ଅଞ୍ଚଳ ପରିଷଦରେ ପରିମଳ ବ୍ୟବସ୍ଥା ବିପର୍ଯ୍ୟସ୍ତ ହୋଇପଡ଼ିଥିବା ଦେଖିବାକୁ ମିଳିଛି। ଏହାକୁ ନେଇ ସାଧାରଣରେ ଘୋର ଅସନ୍ତୋଷ ପ୍ରକାଶ ପାଇଛି। ରମ୍ଭାଥାନାଠାରୁ ମାତ୍ର କେଇ ମିଟର ଦୂରରେ ଗଦା ହୋଇଛି କୁଢ଼ କୁଢ଼ ଅଳିଆ। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
ମିଳିଥିବା ସୂଚନା ଅନୁସାରେ, ରମ୍ଭା ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ୪ ନମ୍ବର ୱାର୍ଡର ଥାନାକୁ ଯିବା ରାସ୍ତା ଦକ୍ଷିଣ ପାର୍ଶ୍ଵରେ କୁଢ଼ କୁଢ଼ ଅଳିଆ ଗଦା ହୋଇଛି। ରାସ୍ତାରେ ଯାତାୟତ କରୁଥିବା ଲୋକମାନେ ଦୁର୍ଗନ୍ଧ ପରିବେଶରେ ଯିବା ପାଇଁ ବାଧ୍ୟ ହେଉଛନ୍ତି। ଏପରିକି ସେହି ରାସ୍ତାରେ ଥାନାକୁ ପ୍ରତ୍ୟେକ ଦିନ ବିଭିନ୍ନ ଅଞ୍ଚଳର ଲୋକମାନେ ଆସିଥାନ୍ତି। ଥାନା ନିକଟରେ ଥିବା ସାହିର ଲୋକମାନେ ମଧ୍ୟ ସେହି ରାସ୍ତାରେ ଯାତାୟତ କରିଥାନ୍ତି। ଅନ୍ୟ ପଟେ ସେହିପରି ଉକ୍ତ ରାସ୍ତା କଡ଼ରେ ଯାତ୍ରୀବାହୀ ଅଟୋଗୁଡ଼ିକ ମଧ୍ୟ ପାର୍କିଂ ହୋଇଥାଏ। ଏସବୁ ସତ୍ତ୍ବେ ସେଠାରେ କିଭଳି ଅଳିଆ ଗଦା ହେଉଛି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
