ଡେହରାଡୁନ : ଉତ୍ତରାଖଣ୍ଡ ପିଥୋରାଗଡ଼ ଜିଲା ଚମ୍ପାବତ ଅଞ୍ଚଳରେ ରବିବାର ଏକ ପିକ୍ଅପ୍ ଭ୍ୟାନ ଭାରସାମ୍ୟ ହରାଇ ଗଭୀର ଖାତକୁ ଖସି ପଡ଼ିଛି। ଏଥିରେ ୭ ଯାତ୍ରୀଙ୍କ ମୃତ୍ୟୁ ଘଟିଛି ଓ ୮ ଜଣ ଗୁରୁତର ଆହତ ହୋଇଛନ୍ତି। ପୁଲିସ୍ ଆହତଙ୍କୁ ଉଦ୍ଧାର କରି ନିକଟସ୍ଥ ହସ୍ପିଟାଲରେ ଭର୍ତ୍ତି କରିଛି।
ସୂଚନା ଅନୁସାରେ କେତେକ ଲୋକ ଅନ୍ତିମ ସତ୍କାର ପାଇଁ ମିରତୋଲିରୁ ଏକ ଶବ ପିକଅପ ଭ୍ୟାନରେ ନେଇ ଶ୍ମଶାନକୁ ଯାଉଥିଲେ। ଭ୍ୟାନରେ ପାଖାପାଖି ୨୦ ଜଣ ଯାତ୍ରୀ ଥିଲେ। ଦିନ ପ୍ରାୟ ୧୨ଟା ବେଳେ ଚମ୍ପାବତର ଲିସା ଡିପୋ ନିକଟରେ ଭ୍ୟାନଟି ଭାରସାମ୍ୟ ହରାଇ ରାସ୍ତା କଡ଼ ଖାତକୁ ଖସିପଡ଼ିଥିଲା। ଏସ୍ଡିଆରଏଫ ଏବଂ ପୁଲିସ୍ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଉଦ୍ଧାର କରିଥିଲେ। ଉଦ୍ଧାର କାର୍ଯ୍ୟରେ ସ୍ଥାନୀୟ ଲୋକ ସହଯୋଗ କରିଥିଲେ। ଘଟଣାସ୍ଥଳରେ ୭ ଜଣଙ୍କ ମୃତ୍ୟୁ ଘଟିଛି। ଅନ୍ୟ ଆହତଙ୍କୁ ଡାକ୍ତରଖାନା ପଠାଯାଇଛି।
