ମୁମ୍ବଇ: ବଲିଉଡ଼ ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ମାମଲାର ସିବିଆଇ ତଦନ୍ତ ଦାବି କରୁଥିବା ବ୍ୟକ୍ତିମାନଙ୍କ ମଧ୍ୟରୁ ଜଣେ ହେଉଛନ୍ତି ନିର୍ଭୟା ଓକିଲ ସୀମା ସମୃଦ୍ଧି। ଏହି ମାମଲାକୁ ସିବିଆଇକୁ ହସ୍ତାନ୍ତର କରିବାକୁ ନିକଟରେ ସେ ନରେନ୍ଦ୍ର ମୋଦୀଙ୍କୁ ଅନୁରୋଧ କରିଥିଲେ। ଏବେ ସେ ଏହି ମାମଲାର ତଦନ୍ତ କରୁଥିବା ମୁମ୍ବଇ ପୁଲିସ ଉପରକୁ ଅଙ୍ଗୁଳି ଉଠାଇଛନ୍ତି। ମାମଲାର ଯାଞ୍ଚରେ ମୁମ୍ବଇ ପୁଲିସର ଭୂମିକା ନେଇ ସୀମା ସନ୍ଦେହ ବ୍ୟକ୍ତ କରିଛନ୍ତି।
ଟ୍ୱିଟ୍ କରି ସେ କହିଛନ୍ତି, ୧୪ ଜୁନରୁ ହିଁ ସନ୍ଦେହ ହେଉଥିଲା ଯେ ଏହା ଆତ୍ମହତ୍ୟା ନୁହେଁ। ଏହା ଏକ ପ୍ରାୟୋଜିତ ହତ୍ୟାକାଣ୍ଡ। ଗଳାର ଚିହ୍ନ, ଯାହାକି ଆଦୌ ଫାଶି ଚିହ୍ନ ଭଳି ଲାଗୁ ନ ଥିଲା, ସୁଇସାଇଡ ନୋଟ ମଧ୍ୟ ମଳି ନ ଥିଲା। ତେବେ ବିନା ଅନୁସନ୍ଧାନରେ ମୁମ୍ବଇ ପୁଲିସ କାହିଁକି ଏହାକୁ ଆତ୍ମହତ୍ୟା ଘୋଷଣା କଲା ବୋଲି ସେ ପ୍ରଶ୍ନ କରିଛନ୍ତି । ସୀମାଙ୍କ ଏହି ପୋଷ୍ଟ ଖୁବ୍ ଭାଇରାଲ ହେଉଛି। ଅନେକ ଲୋକ ସୀମାଙ୍କ କଥାକୁ ସମର୍ଥନ କରିବା ସହ ତାଙ୍କର ପ୍ରଶଂସା କରିଛନ୍ତି।
ସୂଚନାଯୋଗ୍ୟ, କିଛିଦିନ ପୂର୍ବରୁ ସୀମା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟ୍ୱିଟ୍ କରି ଲେଖିଥିଲେ, “ମାନ୍ୟବର ପ୍ରଧାନମନ୍ତ୍ରୀ ମହାଶୟ, ସୁଶାନ୍ତ ସିଂହଙ୍କ ମୃତ୍ୟୁର ସତ୍ୟତା ବିଷୟରେ ଜାଣିବା ପାଇଁ ଆମ ସମସ୍ତ ଭାରତୀୟଙ୍କ ଅଧିକାର ଅଛି। କିନ୍ତୁ ମାସେରୁ ଅଧିକ ସମୟ ବିତି ଯାଇଥିଲେ ମଧ୍ୟ ମୁମ୍ବଇ ପୁଲିସ ସତ ସାମ୍ନାକୁ ଆଣିବାରେ ବିଫଳ ହୋଇଛି। ଆପଣଙ୍କୁ ଅନୁରୋଧ, ଆମ ପ୍ରିୟ ହିରୋଙ୍କ ମାମଲା ଆପଣ ସିବିଆଇକୁ ହସ୍ତାନ୍ତର କରନ୍ତୁ”।
