ଆଠଗଡ : ମୁଣ୍ଡଳି ପୋଲ ଉପରେ ଗୁରୁବାର ରାତି ପ୍ରାୟ ୧୦ଟା ସମୟରେ ବାଇକ ରଖି ଜଣେ ଯୁବକ କେଉଁଆଡେ ନିଖୋଜ ହୋଇଯାଇଥିବା ଜଣାପଡିଛି । ସଂପୃକ୍ତ ଯୁବକ ପୋଲ ଉପରୁ ମହାନଦୀକୁ ଡେଇଁ ଆତ୍ମହତ୍ୟା କରିଥିବାର ସନ୍ଦେହ କରି ଦମକଳ ବାହିନୀ ଖୋଜାଖୋଜି ଚଳାଇଛନ୍ତି । ଘଟଣାର ବିବରଣୀରୁ ପ୍ରକାଶ କଟକ ଜିଲ୍ଲା ନିଆଳି ଥାନା ଅନ୍ତର୍ଗତ କସରଦା ପଞ୍ଚାୟତ ସାରଦା ପ୍ରସନ୍ନ ଷଡଙ୍ଗୀଙ୍କ ପୁଅ ଶାଶ୍ୱତ ଷଡଙ୍ଗୀ ଗୁରୁବାର ରାତିରେ ଏକ ବାଇକରେ ଆସି ମୁଣ୍ଡଳି ପୋଲ ଉପରେ ରଖି ନିଖୋଜ ହୋଇଛନ୍ତି । ଖବର ପାଇ ବାରଙ୍ଗ ଥାନା ଅନ୍ତର୍ଗତ ଗୋଡିସାହି ଫାଣ୍ଡି ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ଅଗ୍ନିଶମ ବିଭାଗକୁ ସୂଚନା ଦେଇଥିଲେ । ପୁଲିସ ବାଇକଟିକୁ ଜବତ କରି ତଦନ୍ତ କରିବା ପରେ ଏହା ଶାଶ୍ୱତଙ୍କର ବୋଲି ଜାଣିବା ପରେ ତାଙ୍କ ପରିବାର ଲୋକଙ୍କୁ ଖବର ଦେଇଥିଲେ । ଶାଶ୍ୱତଙ୍କ ପରିବାର ଲୋକ ସେଠାରେ ପହଞ୍ଚି ତାଙ୍କ ପୁଅ ଆତ୍ମହତ୍ୟା କରିନଥିବ ବରଂ ତାକୁ କେହି ହତ୍ୟା କରିଥିବା ସନ୍ଦେହ କରିଛନ୍ତି । ଗୁରୁବାର ରାତି ୧ଟା ପର୍ଯ୍ୟନ୍ତ ଅଗ୍ନିଶମ ବାହିନୀ ଖୋଜାଖୋଜି କରି କିଛି ସନ୍ଧାନ ନପାଇବାରୁ ଉଦ୍ଧାର କାର୍ଯ୍ୟ ବନ୍ଦ କରିଥିଲେ । ପୁନରାୟ ଶୁକ୍ରବାର ସକାଳୁ ଦିନତମାମ ବନ୍ୟାଜଳ ପ୍ରବାହିତ ହେଉଥିବା ମହାନଦୀରେ ଖୋଜାଖୋଜି ଜାରି ରଖିଥିଲେ ମଧ୍ୟ ଅଦ୍ୟାବଧି ନିଖୋଜ ଶାଶ୍ୱତଙ୍କର ସନ୍ଧାନ ମିଳିପାରିନାହିଁ।
Comments are closed.