ଗୁଣପୁର: ରାଜ୍ୟରେ ନୂତନ ବ୍ଲକ ଓ ତହସିଲ ସଂଖ୍ୟା ବୃଦ୍ଧି କରାଯିବା ନେଇ ରାଜସ୍ଵ ମନ୍ତ୍ରୀଙ୍କ ଘୋଷଣା ପରେ ରାୟଗଡ଼ା ଜିଲ୍ଲାରେ ନୂତନ ବ୍ଲକ ଗଠନ ନେଇ ଦାବି ଜୋର ଧରିଛି । ଏହି କ୍ରମରେ ଗୁଣପୁର ବ୍ଲକ ଅନ୍ତର୍ଗତ ଡମ୍ବସରା ପଂଚାୟତକୁ ନୂତନ ବ୍ଲକ ଭାବେ ଘୋଷଣା କରିବାକୁ ୬ ଗୋଟି ପଂଚାୟତର ବାସିନ୍ଦା ଏକତ୍ରିତ ହୋଇ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ଏକ ସ୍ୱାରକପତ୍ର ସ୍ଥାନୀୟ ଉପଜିଲ୍ଲାପାଳଙ୍କୁ ପ୍ରଦାନ କରାଯାଇଛି। ଏହି ଅବସରରେ ଆବାହକ ଦାଶରଥି ସେନାପତିଙ୍କ ନେତୃତ୍ବରେ ଏକ ଶୋଭାଯାତ୍ରା ଆୟୋଜିତ ହୋଇଥିଲା । ଉକ୍ତ ଶୋଭାଯାତ୍ରାଟି ସ୍ଥାନୀୟ ଏସପି ଗୁଡ଼ା ଛକ ନିକଟରୁ ବାହାରି ସହର ପରିକ୍ରମା କରି ଗୁଣପୁର ଉପଜିଲ୍ଲାପାଳ କାର୍ଯ୍ୟାଳୟରେ ପହଞ୍ଚିଥିଲା । ଶୋଭାଯାତ୍ରାରେ ୬ ଗୋଟି ପଂଚାୟତର ଶତାଧିକ ଲୋକ ସାମିଲ ହୋଇଥିଲେ ।
ପଂଚାୟତ ବାସୀଙ୍କ ପକ୍ଷରୁ କୁହାଯାଇଛି ଯେ , ସଦର ବ୍ଲକରେ ୧୯ ଗୋଟି ପଂଚାୟତ ରହିଛି । ସେଥିମଧ୍ୟରୁ ଡମ୍ବସରା ଏକ ବଡ଼ ପଂଚାୟତ ଅଟେ । ତେଣୁ ଟିଟିମିରି, ଘନାନ୍ତରୀ ,ଭୀମପୁର ,ବାଘଶଳା ,ଚାଲକମ୍ବା ପଂଚାୟତକୁ ନେଇ ଡମ୍ବସରାକୁ ଏକ ନୂତନ ବ୍ଲକ ଭାବେ ଗଠନ କରାଯାଉ ବୋଲି ଦାବି କରାଯାଇଛି । ଭୌଗଳିକ ଦୃଷ୍ଟି କୋଣରୁ ସମସ୍ତ ମାନଦଣ୍ଡ ରହିଥିବାରୁ ଡମ୍ବସରାକୁ ବ୍ଲକ ଘୋଷଣା କରାଗଲେ ଶିକ୍ଷା ,ସ୍ବାସ୍ଥ୍ୟ , ବାଣିଜ୍ୟ ଇତ୍ୟାଦି କ୍ଷେତ୍ରରେ ଅଂଚଳର ଉନ୍ନତି ହୋଇପାରିବ । ଅଂଚଳବାସୀଙ୍କ ସ୍ବାର୍ଥକୁ ରାଜ୍ୟ ସରକାର ଗୁରୁତ୍ବ ନ ଦେଲେ ଆଗାମୀ ଦିନରେ ଆନ୍ଦୋଳନ କରାଯିବ ବୋଲି ପ୍ରତିକ୍ରିୟା ପ୍ରକାଶ ପାଇଛି ।
