ଜୟପୁର : ଘରୋଇ ବିବାଦକୁ କେନ୍ଦ୍ର କରି ବୋହୂ ଶ୍ବଶୁରକୁ ହତ୍ୟା କରିଥିବା ଅଭିଯୋଗ ହୋଇଛି । ଘର ମଧ୍ୟରେ ରକ୍ତ ଜୁଡୁବୁଡୁ ଅବସ୍ଥାରେ ବୃଦ୍ଧଙ୍କ ମୃତଦେହ ପଡି ରହିଥିବା ଦେଖି ଗ୍ରାମବାସୀ ପୁଲିସ ଖବର କରିଥିଲେ । ଘଟଣାସ୍ଥଳରେ ଆମ୍ବାଗୁଡ଼ା ଫାଣ୍ଡି ପୁଲିସକୁ ପହଞ୍ଚି ତଦନ୍ତ ଆରମ୍ଭ କରିଛି । ହତ୍ୟାକାଣ୍ଡ ପରେ ବୋହୂ ଫେରାର ହୋଇଯାଇଛି । ମୃତକ ହେଲେ ଚକ୍ର ଜାନି (୫୦) ଓ ଅଭିଯୁକ୍ତ ହେଲେ ହୀରାମଣି(୩୫) ।
ସୂଚନାଯୋଗ୍ୟ, କୋରାପୁଟ ଜିଲା ଜୟପୁର ବ୍ଲକ୍ ଅନ୍ତର୍ଗତ ଜଗନ୍ନାଥପୁର ଗାଁ ରେ ଏହି ଅଭାବନୀୟ ଘଟଣା ଘଟିଛି । ଗୁରୁବାର ବିଳମ୍ବିତ ରାତିରେ ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି । ପରିବାର ମଧ୍ୟରେ ସର୍ବଦା ଗଣ୍ଡଗୋଳ ଲାଗି ରହୁଥିଲା ବୋଲି ପଡୋଶୀ କହିଛନ୍ତି । ଗତକାଲି କୌଣସି କାରଣକୁ ନେଇ ଉଭୟ ଶ୍ବଶୁର ଓ ବୋହୂଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ପରେ ବୋହୂ ହୀରାମଣି ଏକ ମାରଣାସ୍ତ୍ରରେ ଶ୍ବଶୁରଙ୍କୁ ହତ୍ୟା କରି ସେଠାରୁ ଚମ୍ପଟ ମାରିଛି । ୧୦ ବର୍ଷ ପୂର୍ବରୁ ହୀରାମଣିଙ୍କ ସ୍ୱାମୀ ମୃତ୍ୟୁବରଣ କରିଥିବା ଜଣାପଡିଛି ।