ମୁମ୍ବଇ : କ୍ରିକେଟ କ୍ୟାରିୟରର ସାୟାହ୍ନରେ ଉପନୀତ ହୋଇଥିଲେ ସୁଦ୍ଧା ମହେନ୍ଦ୍ର ସିଂହ ଧୋନିଙ୍କ ଲୋକପ୍ରିୟତାରେ କୌଣସି ପ୍ରତିକୂଳ ପ୍ରଭାବ ପଡୁନାହିଁ। ଧୋନିଙ୍କ ପ୍ରଶଂସକ ତାଲିକାରେ ଯୁବପିଢିଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମସ୍ତେ ସାମିଲ ଅଛନ୍ତି। ଧୋନି ମଧ୍ୟ ନିଜର ପ୍ରଶଂସକଙ୍କୁ ଯଥାସାଧ୍ୟ ସମ୍ମାନ ଜଣାଇବାରେ କେବେ କୁଣ୍ଠାବୋଧ କରିନଥାନ୍ତି। ନିକଟରେ ଏଭଳି ଏକ ଘଟଣା ଦେଖିବାକୁ ମିଳିଛି। ଗୁରୁବାର ସ୍ଥାନୀୟ ୱାଙ୍ଖେଡେ ଷ୍ଟାଡିୟମରେ ଘରୋଇ ମୁମ୍ବଇ ଇଣ୍ଡିଆନ୍ସ ଓ ଚେନ୍ନଇ ସୁପର କିଙ୍ଗ୍ସ ମଧ୍ୟରେ ଆଇପିଏଲ ମ୍ୟାଚ ଖେଳାଯାଇଥିଲା। ଏହି ମ୍ୟାଚରେ ଧୋନିଙ୍କ ନେତୃତ୍ବାଧୀନ ଚେନ୍ନଇ ଦଳ ଅବଶ୍ୟ ପରାସ୍ତ ହୋଇଥିଲା। ତେବେ ମ୍ୟାଚ ଶେଷ ହେବାପରେ ଅପେକ୍ଷାରତ ଜଣେ ବୟସ୍କା ପ୍ରଶଂସିକାଙ୍କ ନିକଟରେ ପହଞ୍ଚି ଧୋନି ନିଜ ମହାନତାର ଆଉ ଏକ ଦୃଷ୍ଟାନ୍ତ ସୃଷ୍ଟି କରିଥିଲେ। ଏହି ମହିଳା ଜଣକ ଏକ ବ୍ୟାନର ଧରି ଡ୍ରେସିଂରୁମ ସମ୍ମୁଖରେ ଧୋନିଙ୍କୁ ଅପେକ୍ଷା କରିଥିଲେ। ‘ଆଇ ଏମ ହିୟର ଓନ୍ଲି ଫର ଧୋନି’ (ମୁଁ କେବଳ ଧୋନିଙ୍କ ପାଇଁ ଏଠାକୁ ଆସିଛି) ବୋଲି ଇଂରାଜୀରେ ଏହି ବ୍ୟାନର ଲେଖାଯାଇଥିଲା। ଏହା ଜାଣିବାପରେ ଧୋନି ଡ୍ରେସିଂରୁମରୁ ବାହାରି ସିଧାସଳଖ ଉକ୍ତ ମହିଳାଙ୍କ ନିକଟରେ ପହଞ୍ଚିଥିଲେ। କିଛି ସମୟ ବାର୍ତ୍ତାଳାପ କରିବାପରେ ଧୋନି ତାଙ୍କ ସହ ସେଲ୍ଫି ଉଠାଇଥିଲେ ଏବଂ ଉକ୍ତ ବ୍ୟାନରରେ ନିଜର ଅଟୋଗ୍ରାଫ୍ ମଧ୍ୟ ଦେଇଥିଲେ। ଧୋନିଙ୍କ ଏତାଦୃଶ ଆଚରଣକୁ ସାମାଜିକ ଗଣମାଧ୍ୟମରେ ଭୂୟସୀ ପ୍ରଶଂସା କରାଯାଇଛି।
Comments are closed.