ଭଙ୍ଗା ହାତରେ ରାସ୍ତାକୁ ଓହ୍ଲାଇଲେ ମିଥୁନ, କଲକାତା ଘଟଣାରେ କହିଲେ..

କଲକତା: ବଲିଉଡ଼ ଅଭିନେତା ମିଥୁନ ଚକ୍ରବର୍ତ୍ତୀଙ୍କର ନିକଟରେ ହାତ ଭାଙ୍ଗିଯାଇଛି ଏବଂ ଏହି ଅବସ୍ଥାରେ ସେ କଲକାତା ରାସ୍ତାକୁ ଓହ୍ଲାଇ ରାଲି କରୁଥିବା ଦେଖିବାକୁ ମିଳିଛି। ମିଥୁନଙ୍କ ସମେତ ଶତାଧିକ ବିଜେପି ସମର୍ଥକ ବୁଧବାର କଲକାତା ରାଜରାସ୍ତାକୁ ଓହ୍ଲାଇଥିଲେ। ମିଥୁନ ଓ ପୂର୍ବତନ କେନ୍ଦ୍ରମନ୍ତ୍ରୀ ସୁଭାଷ ସରକାରଙ୍କ ନେତୃତ୍ବରେ ଅନେକ ଟାଣୁଆ ନେତା ଓ କର୍ମୀ ଏହି ରାଲିରେ ସାମିଲ ହୋଇଥିଲେ। ନିକଟରେ ଆରଜି କର ହସ୍ପିଟାଲରେ ଜଣେ ମହିଳା ଡାକ୍ତରଙ୍କୁ ଦୁଷ୍କର୍ମ ଓ ହତ୍ୟା ମାମଲାରେ ଏହି ରାଲି ବାହାରିଥିଲା।

ସୂଚନାଯୋଗ୍ୟ, କିଛି ସପ୍ତାହ ପୂର୍ବରୁ ମିଥୁନ ଚକ୍ରବର୍ତ୍ତୀଙ୍କ ହାତ ଭାଙ୍ଗି ଯାଇଛି ଏବଂ ଏହି ଅବସ୍ଥାରେ ସେ ଆରଜି କର ହସ୍ପିଟାଲ ମାମଲାରେ ନ୍ୟାୟ ଦାବି କରି କଲକାତା ରାଜରାସ୍ତାକୁ ଓହ୍ଲାଇଥିଲେ। ସ୍ୱାସ୍ଥ୍ୟଗତ ସମସ୍ୟା କାରଣରୁ ସେ ପାଦରେ ଚାଲୁ ନଥିଲେ, ବରଂ ସେ ଏକ ଖୋଲା ଜିପ୍‌ର ଆଗ ସିଟ୍‌ରେ ବସି କାର୍ଯ୍ୟକ୍ରମରେ ସାମିଲ ହୋଇଥିବା ଦେଖିବାକୁ ମିଳିଥିଲା।

୧୮୯୩ ମସିହାରେ ଚିକାଗୋର ବିଶ୍ୱ ଧର୍ମ ସଂସଦରେ ସ୍ବାମୀ ବିବେକାନନ୍ଦଙ୍କ ଐତିହାସିକ ଭାଷଣ ସ୍ମୃତିରେ ଏହି ରାଲିର ଆୟୋଜନ କରାଯାଇଥିଲା। ଏହି ରାଲି କଲକାତା ସେଣ୍ଟ୍ରାଲର ଶିମଲା ରୋଡସ୍ଥିତ ସ୍ୱାମୀ ବିବେକାନନ୍ଦଙ୍କ ପୈତୃକ ଘରୁ ଆରମ୍ଭ ହୋଇ ଶ୍ୟାମବଜାର ଫାଇଭ ପଏଣ୍ଟ କ୍ରସିଂରେ ଶେଷ ହୋଇଥିଲା।

ମିଥୁନ ଚକ୍ରବର୍ତ୍ତୀ ସାମ୍ବାଦିକମାନଙ୍କୁ କହିଛନ୍ତି, ‘‘ଏହି ବିରୋଧ ଥମିବା ଉଚିତ୍ ନୁହେଁ। ବେଙ୍ଗଲ୍ ଏହାର ବୈପ୍ଳବିକ ଇତିହାସ ଏବଂ ଅତ୍ୟାଚାର ବିରୋଧରେ ଲଢେଇ ପାଇଁ ଜଣାଶୁଣା। ଏହି ବେଙ୍ଗଲକୁ ଦେଖି ମୋତେ ଖୁସି ଲାଗୁଛି, ଯିଏ ବର୍ତ୍ତମାନର ଶାସନର ଅତ୍ୟାଚାର ଏବଂ ଦୁର୍ନୀତି ବିରୋଧରେ ଜାଗ୍ରତ ହୋଇଉଠିଛି। ଏକ ଜନ ଆନ୍ଦୋଳନ ଆରମ୍ଭ ହୋଇଛି। ଏହା ଏକ ସ୍ୱତଃ ପ୍ରବୃତ୍ତ ଜନ ଆନ୍ଦୋଳନ।’’