ଶତ୍ରୁଘ୍ନ ସିହ୍ନାଙ୍କ ପାଇଁ କଂଗ୍ରେସକୁ ଧନ୍ୟବାଦ ଜଣାଇଲେ ଜେଟଲୀ, କହିଲେ ଆମ ମୁଣ୍ଡ ବିନ୍ଧା ଏବେ ତମ ପାଖରେ

ନୂଆଦିଲ୍ଲୀ : ବିଜେପିର ବିଦ୍ରୋହୀ ସାଂସଦ ଶତ୍ରୁଘ୍ନ ସିହ୍ନା ଅପ୍ରେଲ ୬ରେ କଂଗ୍ରେସରେ ଯୋଗଦେବାକୁ ଯାଉଛନ୍ତି। ଏନେଇ ବିଧିବଦ୍ଧ ଘୋଷଣା ହୋଇସାରିଛି। ଏହାକୁ ନେଇ ବିଜେପି ନେତା ତଥା କେନ୍ଦ୍ର ଅର୍ଥ ମନ୍ତ୍ରୀ ଅରୁଣ ଜେଟଲୀ ଶୁକ୍ରବାର କଟାକ୍ଷ କରିଛନ୍ତି। ଅରୁଣ ଜେଟଲୀ ଅଭିନେତାରୁ ନେତା ସାଜିଥିବା ଶତ୍ରୁଘ୍ନଙ୍କୁ ମୁଣ୍ଡ ବିନ୍ଧା ବୋଲି କହିଛନ୍ତି। ଏହାସହ ସେ କଂଗ୍ରେସକୁ ଧନ୍ୟବାଦ ଜଣାଇଛନ୍ତି। ସେ ଫେସ୍‍ବୁକର ନିଜ ବ୍ଲଗରେ ଲେଖିଛନ୍ତି ଯେ ବିଜେପିର ଜଣାଶୁଣା କେତେକ ଚେହେରାଙ୍କୁ କଂଗ୍ରେସ ଉପହାର ସ୍ୱରୁପ ଗ୍ରହଣ କରିଛି। ଆମେ ଏଥିପାଇଁ କଂଗ୍ରେସକୁ ଧନ୍ୟବାଦ ଜଣାଉଛୁ। କାରଣ ଆମ ମୁଣ୍ଡ ବିନ୍ଧା ଏବେ ତାଙ୍କର। ଶୁଭ ଭାଗ୍ୟ ପାଇଁ କାମନା।
ଏହାସହ ସେ କଂଗ୍ରେସର ମହାମେଣ୍ଟକୁ ସମାଲୋଚନା କରିଛନ୍ତି। ସେ ଲେଖିଛନ୍ତି ଯେ ମୁଖ୍ୟ ବିରୋଧୀ ଦଳ ପାଇଁ ସବୁକିଛି ଠିକ ଚାଲୁନାହିଁ। କାରଣ ରାହୁଲ ଗାନ୍ଧୀଙ୍କ ନେତୃତ୍ୱରେ କଂଗ୍ରେସ ଦଳ କୌଣସି ବି ରାଜ୍ୟରେ ଅର୍ଥପୂର୍ଣ୍ଣ ମେଣ୍ଟ ଗଠନ କରିବାରେ ସଫଳ ହୋଇନାହିଁ। ଏହାସହ ସେ ମହାମେଣ୍ଟକୁ ରାଜୈତିକ ସର୍କସ ବୋଲି ଉଲ୍ଲେଖ କରିଛନ୍ତି। ମହାମେଣ୍ଟ ସମ୍ପୂର୍ଣ୍ଣ ରୂପେ ବିଫଳ ହୋଇଛି। କାରଣ ତୃତୀୟ ପର୍ଯ୍ୟାୟ ନାମାଙ୍କନର ଶେଷ ତାରିଖ ଆସିଗଲାଣି। ଏପର୍ଯ୍ୟନ୍ତ ସେଭଳି କୌଣସି ମେଣ୍ଟ ହୋଇନାହିଁ ବୋଲି ସେ କହିଛନ୍ତି।