ଦେବଗଡ଼: ଦେଶୀ ରନ୍ଧା ମଦ ଚୋରା ଚାଲାଣ ହେଉଥିବା ବେଳେ ଦେବଗଡ଼ ଅବକାରୀ ବିଭାଗ ପକ୍ଷରୁ ଚଢଉ କରାଯାଇ ଏହାକୁ ଜବତ କରାଯିବା ସହ ବ୍ୟବହୃତ ଏକ ସ୍କୁଟରକୁ ମଧ୍ୟ ଜବତ କରାଯାଇଛି। ଏଥିସହ ଚୋରା ଚାଲାଣକାରୀ ମହିଳାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି। ଗିରଫ ମହିଳା ଜଣକ ଦେବଗଡ଼ ପୌରାଞ୍ଚଳ ପ୍ରଧାନ ସାହିର କଇଁତା ମୁଣ୍ଡା(୪୩) ବୋଲି ଜଣାପଡ଼ିଛି।
ଅବକାରୀ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, କଇଁତା ପ୍ଲାଷ୍ଟିକ ଜାର ଓ ବୋତଲରେ ୧୨ ଲିଟର ଦେଶୀ ରନ୍ଧାମଦ ଭର୍ତ୍ତି କରି ବ୍ୟାଗରେ ପୁରାଇବା ସହ ଏହାକୁ ଏକ ସ୍କୁଟର ଯୋଗେ ଚୋରାଚାଲାଣ କରୁଥିଲେ। ସୂଚନା ପାଇ ଦେବଗଡ଼ ଅବକାରୀ ଇନ୍ସପେକ୍ଟର ମଧୁସୂଦନ ସାହୁଙ୍କ ନେତୃତ୍ୱରେ ବିଭାଗୀୟ ଏଏସଆଇ ରାଜକିଶୋର ସାହୁ ଓ ଅନ୍ୟ କର୍ମଚାରୀମାନେ ଭୋର ପ୍ରାୟ ୫ଟା ସମୟରେ ଦେବଗଡ଼ ପୌରାଞ୍ଚଳର ରଜାମୁଣ୍ଡା ନିକଟସ୍ଥ ୪୯ ନମ୍ବର ଜାତୀୟ ରାଜପଥରେ ତାଙ୍କୁ ଅଟକାଇଥିଲେ। ଯାଞ୍ଚ ସମୟରେ ତାଙ୍କ ନିକଟରୁ ଦେଶୀ ରନ୍ଧାମଦ ଭର୍ତ୍ତି ପ୍ଲାଷ୍ଟିକ ଜାର ଓ ବୋତଲ ଜବତ କରାଯାଇଥିଲା। ଏହା ସହିତ ବ୍ୟବହୃତ ସ୍କୁଟରଟିକୁ ମଧ୍ୟ ଜବତ କରିଥିଲେ। ସେହିପରି କଇଁତାଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି।
Comments are closed.