କଲମପୁର: ଘର ନାହିଁ କି ଘର ନିର୍ମାଣ ପାଇଁ ଜମି ନାହିଁ। ବନ୍ଧ ହୁଡାର ମାଟି ଝାଟି ଘର ହିଁ ସାହା ଭରସା। ପରିବାର ଚଳଣି ପାଇଁ ନାଁ ଅଛି କିଛି ସମ୍ପତି ନାଁ ଅଛି ବୟସ। ଅନ୍ୟପଟେ ସେମାନଙ୍କ ନିଜର ସନ୍ତାନ ସନ୍ତତି ବୋଲି କେହି ନାହାନ୍ତି। ଯେଉଁଥିପାଇଁ ଅତ୍ୟନ୍ତ ଦୟନୀୟ ଭାବେ ପଡୋଶୀଙ୍କ ସହାୟତାରେ ଜୀବନ ଜିଉଁଛନ୍ତି କଲମପୁର ତଲପଡ଼ାର ବୃଦ୍ଧ ଦମ୍ପତି। ସେମାନଙ୍କ ସାହା କେବଳ ଖାଦ୍ୟ ସୁରକ୍ଷା ଯୋଜନାରୁ ପାଉଥିବା ଚାଉଳ ଗଣ୍ଡାକ।
ସୂଚନା ଅନୁସାରେ, କଲମପୁର ତଳପଡ଼ାର ବନ୍ଧପଡ଼ାରେ ବାସକରନ୍ତି ମଧୁସୂଦନ ନାଏକ ଏବଂ ପତ୍ନୀ ତନୟା। ଉଭୟ ଏବେ ବୟସର ଅପରାହ୍ନରେ। ସେମାନଙ୍କର କୌଣସି ସନ୍ତାନ ନାହାନ୍ତି। ବଳ ବୟସ ଥିବା ବେଳେ ପର ଘରେ ମୂଲ ଲାଗି ଯାହା ରୋଜଗାର କରୁଥିଲେ ସେଥିରେ ଉଭୟ ପତି-ପତ୍ନୀ ଚଳିଯାଉଥିଲେ। କିନ୍ତୁ ଏବେ ବୟସ ସରି ଆସିଲା ବେଳକୁ କେହି ନାହାନ୍ତି ସାହା ହେବା ପାଇଁ। ବଳ ମଧ୍ୟ ନାହିଁ କାମ କରି ରୋଜଗାର କରିବା ପାଇଁ। ଏଭଳି ସ୍ଥିତିରେ ସରକାରଙ୍କ ଖାଦ୍ୟ ସୁରକ୍ଷାରୁ ମିଳୁଥିବା ଚାଉଳ ଗଣ୍ଡାକ ସାହା ଭରସା। ଅନ୍ୟପଟେ ବୃଦ୍ଧ ମଧୁସୂଦନ ଏବେ ୭୦ ବର୍ଷ ହୋଇ ସାରିଥିବା ବେଳେ ପତ୍ନୀ ତନୟ ମଧ୍ୟ ୬୦ ପାର କରି ସାରିଲାଣି। କିନ୍ତୁ ପରିତାପର ବିଷୟ ଭୋଟର ପରିଚୟ ପତ୍ରରେ ଉଭୟଙ୍କ ବୟସ ୪୫ ରହିଥିବାରୁ ସରକାରଙ୍କ ସାମାଜିକ ସୁରକ୍ଷା ଯୋଜନାରେ ସାମିଲ ହେଇ ପାରୁନାହାନ୍ତି। ଏହାସହ ସରକାରଙ୍କ ଆବାସ ଯୋଜନା ପାଇଁ ଥିବା ଏସ.ଇ.ସି.ସି ମାନଦଣ୍ଡ ତାଲିକାରେ ନାମ ତାଲିକାଭୁକ୍ତ ହୋଇନଥିବାରୁ ଏହି ଗରିବ ବୃଦ୍ଧ ଦମ୍ପତି ଅତ୍ୟନ୍ତ ଦୟନୀୟ ଅବସ୍ଥାରେ ପଡ଼ିଛନ୍ତି। ଏନେଇ ବିଡିଓ ବିଜୟ କୁମାର ମାଣ୍ଡାଙ୍ଗିଙ୍କ ସହ ଯୋଗାଯୋଗ କରାଯିବା ପରେ ତୁରନ୍ତ ଏନେଇ ବ୍ୟବସ୍ଥା କରାଯିବ ଏବଂ ସାମାଜିକ ସୁରକ୍ଷା ଯୋଜନାରୁ ଭତ୍ତାର ବ୍ୟବସ୍ଥା କରାଯିବ ବୋଲି ସୂଚନା ଦେଇଛନ୍ତି।
