କଲମପୁର: ବିଜୁ ଏକ୍ସପ୍ରେସ ରାସ୍ତାର ଗୋଲାମୁଣ୍ଡା ବ୍ଲକ୍ ବୃନ୍ଦାବାହାଲ ଛକଠାରେ ଶନିବାର ଘଟିଥିଲା ଏକ ମର୍ମନ୍ତୁଦ ଦୁର୍ଘଟଣା। ଏକ ସ୍କୁଟିକୁ ହାଇଓ୍ବା ଧକ୍କା ଦେବାରୁ ଚାଲିଯାଇଥିଲା ଜଣେ ଛାତ୍ରୀଙ୍କ ଜୀବନ। ଦୁର୍ଘଟଣାରେ ପ୍ରାଣ ହରାଇଥିବା ଛାତ୍ରୀ ଜଣକ ହେଲେ କଲମପୁର ଥାନା ଅଞ୍ଚଳର ଟେମେରା ଗ୍ରାମର ଆକାଂକ୍ଷା ନାଏକ(୧୭)। ସେ କଲମପୁରସ୍ଥିତ +୨ ଅମୋହମଣି ଉଚ୍ଚ ମାଧ୍ୟମିକ ବିଦ୍ୟାଳୟରେ କଳା ବିଭାଗର ୨ୟ ବର୍ଷରେ ପଢୁଥିଲେ। ସୋମବାର ଏନେଇ +୨ ଅମୋହମଣି ଉଚ୍ଚ ମାଧ୍ୟମିକ ବିଦ୍ୟାଳୟଠାରେ ଭାରପ୍ରାପ୍ତ ଅଧ୍ୟକ୍ଷ ଓ ସମସ୍ତ ଛାତ୍ରଛାତ୍ରୀ ଆକାଂକ୍ଷାଙ୍କ ଫଟୋଚିତ୍ରରେ ପୁଷ୍ପ ଅର୍ପଣ କରିବା ସହ ଅମର ଆତ୍ମାର ଶାନ୍ତି ନିମନ୍ତେ ଦୁଇ ମିନିଟ ନୀରବ ପ୍ରାର୍ଥନା କରି ମହାମୃତ୍ୟୁଞ୍ଜୟ ମନ୍ତ୍ର ପାଠ କରିଥିଲେ। ବିଦ୍ୟାଳୟ କର୍ତ୍ତୃପକ୍ଷ, ସମସ୍ତ ଅଧ୍ୟାପକ, କର୍ମଚାରୀ ଏବଂ ସମସ୍ତ ଛାତ୍ରଛାତ୍ରୀ ଆକାଂକ୍ଷାଙ୍କ ମୃତ୍ୟୁ ପାଇଁ ଶୋକ ପ୍ରକାଶ କରିଥିଲେ।
ସୂଚନାଯୋଗ୍ୟ, ମୃତ ଆକାଂକ୍ଷା ନିଜ ମାଆ ଓ ବଡବାପାଙ୍କ ସହ ସମ୍ପର୍କୀୟଙ୍କ ଘରୁ ନିଜ ଗ୍ରାମକୁ ଏକ ସ୍କୁଟି ଯୋଗେ ଫେରୁଥିବା ସମୟରେ ଏହି ଦୁର୍ଘଟଣା ଘଟିଥିଲା। ଘଟଣା ସ୍ଥଳରେ ଆକାଂକ୍ଷାଙ୍କ ମୃତ୍ୟୁ ଘଟିଥିଲା। ଏହି ଖବର ଶୁଣି ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା।
Comments are closed.